काठमाडौं। भ्रष्टाचार मुद्दा दर्ता भएपछि निलम्बनमा परेका तत्कालीन मुख्यसचिव डा. बैकुण्ठ अर्याललाई विशेष अदालतले ५० हजार धरौटीमा रिहा गरेको छ।
अदालतका अध्यक्ष टेकनारायण कुँवर तथा सदस्यहरु जितेन्द्र थापा र रामबहादुर थापाको इजलासमा करिब ४ घण्टासम्म भएको बयान र त्यसपछि भएको थुनछेक बहसपछि अर्याल ५० हजार रुपैयाँ धरौटीमा रिहा भएको अदालतका प्रवक्ता धनबहादुर कार्कीले जानकारी दिए। ‘आइतबार अर्यालको बयानका साथै मुद्दामा थुनछेक बहस भयो,’ कार्कीले भने, ‘इजलासले ५० हजार धरौटीमा छोड्न आदेश दियो।’
अन्तःशुल्क स्टिकर छपाइमा भष्टाचार भएको भन्दै ३८ करोड ६७ लाख १७ हजार रुपैयाँ विगो कायम गरी अख्तियार दुरुपयोग अनुसन्धान आयोगले असार ९ गते अर्यालसहित ११ जना र एक फर्मविरुद्ध विशेष अदालतमा मुद्दा दायर गरेको थियो। मुद्दा दायरपछि अदालतले अभियुक्तहरूसँग बयान लिइरहेको छ।
यसै क्रममा अदालतले बयानका लागि हाजिर हुन अर्यालका नाममा ३५ दिने सूचना जारी गरेको थियो। अर्याल आइतबार बिहान साढे १० बजे अदालत हाजिर भएका थिए।
मुद्दाका कारण निलम्बनमा परेपछि सरकारले अर्याललाई राष्ट्रिय योजना आयोगमा विशेष दरबन्दी सिर्जना गरेर सरुवा गरेको थियो। अर्यालविरुद्ध अख्तियारले टेरामक्स खरिदमा पनि अनुसन्धान गरिरहेको छ।
अर्यालले धरौटी बुझाएर बाहिरिने क्रममा संचारकर्मीलाई तपाईंहरुको इच्छा पूरा भएन भनी प्रतिक्रिया दिएका थिए।
