पर्यटकीय राजधानी पोखरामा कति आउँछन् पर्यटक ? छैन कुनै निकायसँग तथ्यांक

बिजमाण्डू
२०८० चैत्र २० गते १५:५० | Apr 2, 2024
पर्यटकीय राजधानी पोखरामा कति आउँछन् पर्यटक ? छैन कुनै निकायसँग तथ्यांक

काठमाडौं । पर्यटकीय राजधानी घोषणा गरिएको पोखरा भित्रने विदेशी पर्यटकको संख्या यकिन हुन सकेको छैन। नेपाल घुम्न आउने पर्यटकमध्ये आधा पर्यटक पोखरा भित्रने आंकलन गरिए पनि वास्तविक तथ्यांक कुनै निकायसँग पनि छैन।

Tata
GBIME
NLIC

पर्यटकको विवरण राख्ने संरचना र प्रणाली नहुँदा पोखरा आउने पर्यटकको संख्या यकिन हुन नसकेको पोखरा पर्यटन परिषद्का अध्यक्ष पोमनारायण श्रेष्ठले बताए।

‘बर्सेनि पर्यटकको आवागमन वृद्धि हुँदै आएको छ तर हामी पहिलेकै अनुमानका भरमा छौं। दैनिक, मासिक या वर्षमा कति विदेशी पर्यटक पोखरा प्रवेश गरे भन्ने आधिकारिक तथ्यांक अहिलेसम्म कसैले राख्न सकेको छैन,’ उनले भने।

पर्यटकको स्पष्ट संख्या राख्न सकिएमा पर्यटनसम्बन्धी योजना तथा कार्यक्रम निर्माणमा सहजता हुने उनको भनाइ छ।

यस सम्बन्धमा नेपाल पर्यटन बोर्डलगायत राज्यका निकायसँग पटकपटक माग गर्दा पनि सुनुवाइ नभएको अध्यक्ष श्रेष्ठले बताए।

‘पोखरा पर्यटकीय राजधानी घोषणा भइसकेको अवस्थामा अब पर्यटकको संख्या संकलनका लागि तुरुन्त आवश्यक व्यवस्था गर्नुपर्छ,’,उनले भने, ‘विमानस्थल र सडक नाकामा सूचना केन्द्रसहितका पर्यटक डेस्क राख्नुपर्छ।’

श्रेष्ठले गण्डकी प्रदेश सरकार र पोखरा महानगरपालिकाले पोखरा भित्रने नाकामा पर्यटक डेस्क स्थापनाका लागि चासो लिए पनि कार्यान्वयन हुन नसकेको बताए।

हवाई यात्राबाट आउने पर्यटक पोखरा अन्तर्राष्ट्रिय विमानस्थल भएर पोखरा भित्रन्छन्। स्थलमार्गबाट भित्रने पर्यटक पृथ्वी राजमार्ग, सिद्धार्थ राजमार्ग र मध्यपहाडी लोकमार्ग हुँदै पोखरा आइपुग्छन्।

नेपाल पर्यटन बोर्ड गण्डकी प्रदेश कार्यालयका प्रमुख नवीन पोखरेलले पर्यटकीय राजधानी आउने पर्यटकको यथार्थ विवरण राख्न नसक्नु कमजोरी रहेको बताए।

बोर्डको पहलमा विमानस्थल र पर्यटक बसपार्कमा पर्यटकको संख्या लिन आवश्यक तयारी गरिएको उनको भनाइ छ।

‘माइक्रोलगायत अन्य निजी सवारीसाधनबाट पर्यटक आइरहेका हुन्छन्। पोखरा जोडिने सडक नाका पनि धेरै छन्,’ पोखरेलले भने, ‘पोखरामा रहेका पर्यटकस्तरीय होटलले सफ्टवेयर प्रणालीमार्फत पर्यटकको विवरण राख्न सकेमा मोटामोटी संख्या आउँछ।’

होटल व्यवसायीलाई दैनिक बास बसेका पर्यटकको विवरण दिन आग्रह गरिए पनि व्यवसायीले उपलब्ध नगराएको उनको भनाइ छ। संख्या अन्दाज गर्ने विषय नभएको भन्दै उनले सम्बद्ध सबै पक्ष यसमा जिम्मेवार र जवाफदेही हुनुपर्ने बताए। अन्नपूर्ण संरक्षण क्षेत्र आयोजना (एक्याप) का प्रमुख डा रबिन कडरियाले ‘एक्याप’ प्रवेश गर्ने विदेशी पर्यटकको मात्र संख्या राख्ने गरिएको बताए।

उनका अनुसार पोखरा आएकामध्ये झन्डै आधा पर्यटक मात्र ‘एक्याप’ को भ्रमण गर्छन्।

‘यस क्षेत्रमा सबैभन्दा बढी भारतीय पर्यटकीय आउँछन्। अन्नपूर्ण क्षेत्र पदयात्राका लागि विश्वमै आकर्षक गन्तव्य मानिन्छ। एक्यापले ठाउँठाउँमा चेकपोष्ट र पर्यटक सूचना केन्द्रमार्फत विदेशी पर्यटकको विवरण संकलन गर्छ,’ उनले भने।

पोखरा भित्रने पर्यटकको संख्यालाई संख्या प्रणालीमा राख्न अब ढिलाइ गर्न नहुने डा कडरियाले बताउँछन्। पछिल्लो समय पोखरा आसपासका गन्तव्यमा भारतीय पर्यटकको संख्या उल्लेख्य वृद्धि भएको उनको भनाइ छ।

प्राकृतिक सुन्दरता, जैविक विविधता, हिमाली जनजीवन, संस्कृति आदिले यस क्षेत्र पर्यटकको रोजाइमा पर्ने गरेको डा कडरियाले बताए। प्राचीन संस्कृति, कला र सभ्यताका दृष्टिले पनि पोखरा र सिङ्गो गण्डकी प्रदेश अगाडि छ । यहाँका जातीय पर्व, परम्परा र रीतिरिवाजले पनि पर्यटकलाई लोभ्याउने गर्छ । परम्परा झल्काउने गीत, नाच र झाँकी पोखराका सांस्कृतिक धरोहर हुन्। आकर्षक गन्तव्यस्थल, पर्यटनमैत्री पूर्वाधार, स्तरीय आतिथ्यता र सेवासुविधालाई आधार मानेर पोखरालाई हालै पर्यटकीय राजधानी घोषणा गरिएको थियो।