काठमाडौं। सरकार र आन्दोलनरत चिकित्सकबीच सहमति भएको छ। सुरक्षित कार्यस्थलको माग राख्दै आन्दोलनरत चिकित्सक संघर्ष समिति र सरकारी टोलीबीच ६ बुँदे सहमति भएको हो।
उपप्रधानमन्त्री एवम् गृहमन्त्री नारायणकाजी श्रेष्ठको उपस्थितिमा गृह मन्त्रालयमा शनिबार सम्पन्न वार्तामा ६ बुँदे सहमति भएको हो।
सहमतिमा स्वास्थ तथा जनसंख्या मन्त्रालयका निमित्त सचिब डा दिपेन्द्ररमण श्रेष्ठ र संघर्ष समितिका संयोजक डा शेषराज घिमिरेले हस्ताक्षर गरेका छन्।
पछिल्लो समय मणिपाल-पोखरा, माडी-चितवन, हेटौंडा, कन्चनपुरको बेलौरी, लमजुङ, पाटनलगायतका अस्पतालहरूमा घटेका घटनाका दोषीलाई तत्काल पक्राउ गरी कारबाही गर्नुपर्ने र चिकित्सकको सुरक्षा सुनिश्चितता हुनुपर्ने माग संघर्ष समितिले राखेको थियो।
सहमतिसँगै चिकित्सकका आन्दोलनका सबै कार्यक्रम फिर्ता भएका छन्।
