अघिल्लो वर्ष ८८ लाख कमाएको फाइनान्स रियलस्टेटमा कर्जा बढाएपछि तीन महिनामा ३६ लाख घाटामा

बिजमाण्डू
२०६९ कात्तिक २१ गते ००:०० | Nov 6, 2012

काठमाडौं । रियलस्टेटमा दिएको ऋण नउठेपछि एभरेष्ट फाइनान्स लिमिटेड घाटामा गएको छ । ८ करोड ४२ लाख रुपैयाँ पुँजी भएको कम्पनी ३६ लाख रुपैयाँ घाटामा गएको छ । जबकी तीन महिना अघिको (असार मसान्त) वासलातमा कम्पनीले ८८ लाख रुपैयाँ नाफा देखाएको थियो ।
एक वर्षको अवधिमा कम्पनीले रियलस्टेट कर्जा २ सय ३३ प्रतिशतले वढाएको छ । अनियन्त्रित हिसावले बढाएको रियल स्टेट कर्जा डुबेपछि कम्पनी घाटामा गएको हो । रियलस्टेट कर्जा नउठेपछि कम्पनीको नोक्सानी व्यवस्था (प्रोभिजनिङ) को रकम पनि वेपत्ता वढेको छ । प्रोभिजङ ८ लाख २१ हजार रुपैयाँ रहेकोमा १ सय २६ प्रतिशतले वढेर १८ लाख ५५ हजार पुगेको छ ।
राष्ट्र बैंकबाट ५६औं फाइनान्स कम्पनीका रुपमा सञ्चालन स्वीकृति लिएको कम्पनीको ४० प्रतिशत सेयर सर्वसाधारणमा छ । २०६० बाट सञ्चालनमा आएको कम्पनीले पाँच वर्षयता सेयरधनीलाई केही पनि दिन सकेको छैन । कम्पनीले आफ्ना अन्य ऋणहरु पनि बढाएको छ । फाइनान्सको कुल ऋण एक वर्षमा ५० प्रतिशतले वढेर ३७ करोड २६ लाख पुगेको छ । निक्षेप पनि साढे ५१ प्रतिशतले वढेको छ । कम्पनीले सर्वसाधारणबाट ४२ करोड २१ लाख निक्षेप उठाएको छ ।
ऋण नउठेका कारण ब्याज आम्दानी पनि ८० प्रतिशतले घटेको छ । अघिल्लो असोजमा ४१ लाख ब्याज आम्दानी गरेको कम्पनीले यसपाली जम्मा ८ लाख रुपैयाँ मात्र गरेको छ । असार मसान्तमा मात्रै व्याज आम्दानी २ करोड १० लाख गरेको थियो ।

Tata
GBIME
Nepal Life



भारतबाट नेपाल आयात गरेको तेल बंगलादेश पुर्याएपछि छानविनमा, दालको कालो खेल के हो ?

बिजमाण्डू
२०६९ कात्तिक २१ गते ००:०० | Nov 6, 2012

काठमाडौं । भारतबाट नेपाल आयात गरेको दाल बंगलादेश पठाएर सरकारबाट नगद अनुदान लिने दुगड समूह राजस्वको छापामा परेको छ । टीएम
दुगड समूहको वीरगञ्ज, नेपालगञ्ज र टीकापुरमा भएको उद्योग र गोदाममा राजस्व अनुसन्धान विभागले छापा मारेको हो ।
समूहले भारतबाट चोरी पैठारी गरेर ल्याएको दाल नेपाली उत्पादन भन्दै बंगलादेश लगेर विक्री गर्दछ । दाल तेस्रो मुलुकमा निर्यात गरेपछि सरकारले चार प्रतिशत अनुदान दिन्छ ।
दुगड समूहले नेपालगञ्जको पूजा दाल मिल र त्यसैको सवसिडरी कम्पनी अमृत पल्स मिल टीकापुरबाट दाल निर्यात गर्दै आएको छ । कम्पनीसँग यो उद्योगमा दैनिक ५० मेट्रिक टन दाल प्रशोधन गर्ने क्षमता छ । कम्पनीले मसुर (रातो), चना र कालो दाल निर्यात गर्दै आएको छ । कम्पनीले दालबाट उत्पादन गरेको बेसन पनि निर्यात गर्दछ ।
केही महिना अघि निकासी उद्योगका नाममा दाल उद्योगले कालो काम गरिरहेको एक्सक्लुसिभ समाचार बिजमाण्डूले प्रकासित गरेको थियो । (हेर्नुहोस् तलको लिंक)
समूहले खाद्य पदार्थ प्याकेजिङ्ग र वितरण गर्न कम्पनी स्थापना गरको छ ।
राजस्व अनुसन्धान विभागमा दुगड समूहले दाल भारतबाट चोरी पैठारी गरेको र त्यसलाई बंगलादेश निर्यात गरेको उजुरी परेको छ । यही उजुरीका आधारमा विभागले छापा हानेको हो । विभागले सोमवार पनि काठमाडौंका नौ स्थानमा आउटलेट खोलेको हट ब्रेडमा छापा हानेको थियो । दुगड समूह नक्कली भ्याट विल काण्डमा पनि फसेको छ ।

Tata
GBIME
Nepal Life

भारतको दाल बंगलादेश पठाएर करोडौं अनुदान, विनौद चौधरी पनि पछि परेनन्

http://bizmandu.com/content/-117.html#.UJjjCGfHdd4