काठमाडौं । नेपाल स्टक एक्सचेन्ज नेप्से मा सुचीकृत ६४ कम्पनील शुक्रबारसम्म नाफाबाट लाभांस घोषणा गरेका छन् । सबैभन्दा वढी लाभांस युनिलिभर नेपालले घोषणा गरेको छ ।
युनिलिभरले गत वर्षको नाफाबाट ६ सय ८० प्रतिशत नगद लाभांस घोषणा गरेको हो । यसपछि राष्ट्रिय बिमा संस्थानले लाभांस घोषणा गरेको हो । संस्थानले ९३ प्रतिशत वोनस सेयर दिने निर्णय गरेको भएपनि बिमा समितिले साधारणसभा गर्न रोक लगाएकाले यो अनिस्चित भएको छ ।
५० प्रतिशतभन्दा वढी लाभांस चार कम्पनीले घोषणा गरेका छन् । स्ट्यान्डर्ड चार्टर्ड बैंक नेपालले १५ प्रतिशत वोनस सेयर र ४५ प्रतिशत नगद गरि ६० प्रतिशत लाभांस घोषणा गरेको छ । नबिल बैंकले २० प्रतिशत वोनस सेयर र ४० प्रतिशत नगद घोषणा गरेको छ ।
चिलिमे हाइड्रो पावर कम्पनी र मुक्तिनाथ विकास बैंकले ५० प्रतिशतका दरले लाभांस घोषणा गरेका छन् । चिलिमेले ३० प्रतिशत वोनस सेयर र २० प्रतिशत नगद तथा मुक्तिनाथले २२.५ प्रतिशत वोनस सेयर र २७.५ प्रतिशत नगद लाभांस घोषणा गरेको छ ।
ठूला र नाम चलेका बैंकका तुलनामा क्षेत्रीय स्तरका विकास बैंकहरुले वढी लाभांस घोषणा गरेका छन् । सबैभन्दा कम लाभांस जनता बैंक नेपालले घोषणा गरेको छ । जनताले ३.६८ प्रतिशत नगद दिने भएको हो । सानिमाले ५.५ शुभलक्ष्मीले ५.७५ नगद लाभांस दिने घोषणा गरेका छन् ।