काठमाडौं। सत्तारुढ राष्ट्रिय स्वतन्त्र पार्टी (रास्वपा) घरजग्गाको खोजीमा लागेको छ। रास्वपाले काठमाडौंको चक्रपथ भित्र वा चक्रपथबाट नजिकको दूरीमा कम्तीमा ३ रोपनी जग्गासहितको घर वा जग्गा किन्न खोजेको हो।

घर जग्गा खरिदका लागि रास्वपाले बुधबार प्रस्ताव आह्वान गरेको छ। इच्छुक घरधनी/जग्गाधनीलाई प्रस्ताव पेस गर्न २१ दिनको समय दिइएको छ।

‘पार्टीको बढ्दो सांगठनिक आवश्यकता र दीर्घकालीन संस्थागत स्थायित्वका लागि हालको अस्थायी व्यवस्थापनलाई प्रतिस्थापन गरी केन्द्रीय कार्यालयलाई आफ्नै स्वामित्वको स्थायी संरचनामा स्थानान्तरण गर्ने असोज १७ गतेको केन्द्रीय समितिको निर्णयबमोजिम घर/जग्गा खरिद गर्नुपर्ने भएको छ,’ रास्वपाले आह्वान गरेको सूचनामा भनिएको छ, ‘आवागमनका दृष्टिले सहज, पर्याप्त भौतिक पूर्वाधार भएको र कार्यालय सञ्चालनका लागि उपयुक्त वातावरण भएको घर वा ‌ पूर्वाधार निर्माण गर्न पुग्ने जग्गा आवश्यक परेको हुँदा, देहायका सर्त तथा मापदण्ड पूरा गर्ने इच्छुक घरधनी/जग्गाधनीबाट यो सूचना प्रकाशित भएको मितिले २१ दिनभित्र प्रस्ताव पेस गर्नुहुन अनुरोध गरिन्छ।’

घरजग्गा कम्तीमा २० फिटको सडकले छोएको हुनुपर्ने, कुनै बैंक तथा वित्तीय संस्थामा रोक्का नरहेको र कानुनी विवादमा नपरेको हुनुपर्ने सर्त छ।