काठमाडौं । बबरमहलमा रहेको सडक विभाग जेनजी आन्दोलनका क्रममा तोडफोड र आगजनी भयो। राणाकालीन दरबारलाई हालै केही महिनाअघिमात्रै पुनर्निर्माण गरेर संचालनमा ल्याइएको थियो।
तर, एक साता अघिको आन्दोलनका क्रममा यो महल तहसनहस बनाइयो। बबरमहलमा रहेको सडक विभागको महानिर्देशकको कार्यकक्ष, पुल महाशाखा र अन्तर्गतका शाखा , वैदेशिक सहायता समन्वय महाशाखा र अन्तर्गतका शाखाहरु, यान्त्रिक महाशाखा र अन्तर्गतका शाखाहरु, सम्भार महाशाखा र अन्तर्गतका शाखाहरु क्षतिग्रस्त भएका छन्।
यस्तै, प्रशासन शाखा, उत्तर-दक्षीण तथा व्यापारिक मार्ग विस्तार आयोजना र अन्तर्गतका शाखाहरु र आर्थिक प्रशासन शाखा पूर्ण रुपमा क्षति भएको छ।
पुष्पलाल(मध्यपहाडी) राजमार्ग आयोजना निर्देशनालय, नागढुङ्गा सुरुङ्गमार्ग आयोजना, हुलाकी राजमार्ग योजना निर्देशनालय र अन्तर्गतका शाखाहरु, कानुन तथा विवाद व्यवस्थापन शाखा र सडक सुधार तथा विकास योजना कार्यालयको आंशिक क्षति भएको जनाइएको छ।
सडक विभागमा दुई पांग्रे करिब ७५-८० वटा, चार पांग्रे करिब ६५-७० वटा पूर्ण रुपमा क्षति भएको जनाइएको छ। सडक विभाग मातहतका कार्यालयमा दुई पांग्रे करिब ९-१२ वटा, चार पांग्रे करिब २५-३० वटा पूर्ण रुपमा क्षति भएको छ।
सडक विभाग मातहतका कार्यालयमा सडक डिभिजन भक्तपुर, दाङ, चंद्र्पुर, महेन्द्रनगर (धनगडी साइट अफिस) , हुलाकी आयोजना (धनगढी साइट अफिस) पनि पूर्ण रुपमा क्षति भएको देखिन्छ।
