काठमाडौं ।भैरहवा विशेष आर्थिक क्षेत्र(सेज)मा उद्योग स्थापना गर्न ईच्छुक व्यवसायीले दुई साताभित्र काम नथाले उनीहरूसँगको सम्झौता खारेज हुने भएको छ।

उद्योग स्थापनाको अनुमति लिएर काम सुरु नगरेपछि उनीहरूसँगको सम्झौता खारेज गरेर अघि बढ्ने तयारी भइरहेको सेजका कार्यकारी निर्देशक चण्डिकाप्रसाद भट्टले जानकारी दिए। उद्योगीले उद्योग सञ्चालनका लागि अनुमति लिएपनि काम नथालेपछि आफूहरूले कडाइ गर्न खोजेको भट्टले बताए। "हामीले धेरै समय कुरिसकेका छौँ, अब कुर्ने पक्षमा छैनौं," भट्टले भने, "दुई सातामा पनि काम नथाले सम्झौता खारेजीमा जान्छौं।"

सेजमा उद्योग स्थापनाका लागि आफूहरूले आवश्यक वातावरण तयार गरिरहेको भन्दै उनले तत्काल अघि बढ्न कुनै समस्या नरहेको उल्लेख गरे। "धेरै उद्योगीले विद्युतको समस्या देखाएका छन्। त्यो पनि अब समाधान हुने अवस्थामा छ," उनले भने, "तत्काल काम गर्न केही समस्या छैन। त्यसैले प्रतिबद्धता जनाएका उद्योगीले काम थाल्नुपर्छ।"

कार्यक्रममा भट्टले भैरहवा सेजभित्र विद्युत सबस्टेसन बनाउन ठेक्का प्रक्रिया अन्तिम चरणमा रहेको भन्दै काम सुरु गरेको ९ महिनामा त्यसलाई पूरा गर्ने जानकारी पनि दिए।  भट्टले अन्तर्राष्ट्रिय बजार पर्याप्त नदेखेका कारण उद्योगीहरू आकर्षित नभएको भन्दै त्यसको सहजीकरणका लागि आफूहरू काम गरिरहेको बताए।

नेपाल विद्युत प्राधिकरणका कार्यकारी निर्देशक कुलमान घिसिङले भैरहवा सेजमा तत्काल ४ मेगावाट विद्युत उपलब्ध रहेको भन्दै सबस्टेसन बनेपछि आवश्यक १४ मेगावाट विद्युत डेडिकेटेड फिडरमार्फत उपलब्ध गराउने बताए।भैरहवा सेज भित्र सबस्टेन बनाउने जिम्मा उद्योग मन्त्रालयको हो। भैरहवा सेजमा २६ उद्योग सञ्चालन गर्न उद्योगीले अनुमती लिएका छन्।

कूल ५ हजार ४ सय ५२ जनालाई रोजगारी दिने गरि ७ अर्ब २६ करोड रूपैयाँ बराबरको लगानी प्रस्ताव गरिएको छ। भैरहवा सेज सञ्चालन गर्न १४ मेगावाट विद्युतको माग हुने अनुमान गरिएको छ।