काठमाडौं। चालु वर्षको पहिलो महिना सरकारको चालु खाता ३० अर्ब ८९ करोड रुपैयाँ बचतमा देखिएको छ। पोहोर साउनको तुलनामा चालु खाता शतप्रतिशत भन्दा धेरै बढेको हो।
गत वर्ष साउनमा चालु खाता १३ अर्ब ३७ करोड रुपैयाँ बचतमा थियो। शोधनान्तर स्थितिमा पनि सुधार देखिएको छ।
शोधनान्तर स्थिति ४० अर्ब ९० करोड रुपैयाँ बचतमा रहेको राष्ट्र बैंकले जनाएको छ। गत वर्ष साउनमा शोधनान्तर स्थिति ३६ अर्ब ४३ करोड रुपैयाँ बचतमा थियो।
विदेशी विनिमय सञ्चिति २.५ प्रतिशतले बढेर २० खर्ब ९२ अर्ब २२ करोड रुपैयाँ पुगेको छ भने १ खर्ब ३६ अर्ब ९३ करोड रुपैयाँ रेमिटेन्स भित्रिएको छ।
यो रेमिटेन्स एकै महिनामा भित्रिएको अहिलेसम्मकै दोस्रो धेरै हो। यसअघि पोहोर कात्तिकमा १ खर्ब ३६ अर्ब ९७ करोड रुपैयाँ रेमिटेन्स भित्रिएको थियो।
