काठमाडौँ । जलाशययुक्त बुढीगण्डकी जलविद्युत् आयोजनाको सम्भाव्यता तथा विस्तृत अध्ययनको जिम्मेवारी ट्याक्टेवल इन्जिनियरिङ्ग एसए फ्रान्सले पाएको छ । छ सय मेगावाटको यो आयोजनाको विस्तृत अध्ययनका लागि ९७ करोड रुपैयाँ खर्च हुनेछ ।
परामर्श सेवाका लागि नेपाल विद्युत् प्राधिकरण र ट्याक्टेवल फ्रान्सबीच आइतवार सम्झौता भएको हो । नेपाल विद्युत् प्राधिकरण सञ्चालक समितिका अध्यक्ष तथा ऊर्जा मन्त्रालयका सचिव हरिराम कोइराला र फ्रान्सका राजदूत जाँ चाल्र्स डामारकिसको उपस्थितिमा हस्ताक्षर भएको थियो ।
सम्झौताअनुसार परामर्शदाताले आयोजनाको स्थलगत अन्वेषण, सम्भाव्यता अध्ययन, वातावरणीय असर मूल्याङ्क, सामाजिक अध्ययन र पुनःस्थापनाको कार्ययोजना र विस्तृत इन्जिनियरिङ ढाँचासहित पूर्ण बोलपत्रको कागजात तयार गर्नेछ ।
कार्यक्रममा फ्रान्सका राजदूत डामारकिसले नेपालको जलविद्युत् विकासका लागि फ्रान्सले विशेषज्ञता उपलब्ध गराउन पाउँदा खुसी लागेको बताउनुभयो । ऊर्जा मन्त्रालयका सचिव कोइरालाले बुढीगण्डकी विकास समितिमार्फत आयोजनाका अन्य कार्य अगाडि बढाउने जानकारी दिनुभयो । उहाँले अध्ययनकै अवधिमा परियोजना निर्माणका लागि वित्तीय व्यवस्थापन समेत जुटाउने बताउनुभयो ।