काठमाडौं। स्पेन फिफा विश्वकप २०२६ को च्याम्पियन बनेको छ। आज सम्पन्न फाइनल खेलमा अतिरिक्त समयमा अर्जेन्टिनामाथि १-० गोलको साँघुरो जित निकाल्दै फिफा विश्वकप २०२६ को उपाधि जितेको हो। अमेरिकाको न्युयोर्क-न्यु जर्सी स्टेडियममा आइतबार राति सम्पन्न फाइनलमा फेरान टोरेसले गरेको एक मात्र गोल निर्णायक बन्यो।
निर्धारित ९० मिनेटसम्म दुवै टोलीले गोल गर्न सकेनन्। स्पेनले खेलभर बल नियन्त्रणमा राख्दै लगातार दबाब सिर्जना गरे पनि अर्जेन्टिनाका गोलकिपर एमिलियानो मार्टिनेजले उत्कृष्ट प्रदर्शन गर्दै टोलीलाई खेलमा जोगाइरहेका थिए।
खेलको इन्ज्युरी समयमा अर्जेन्टिना १० खेलाडीमा सीमित भयो। मिडफिल्डर एन्जो फर्नान्डेज दोस्रो पहेँलो कार्डपछि रातो कार्ड खाँदै मैदानबाट बाहिरिए। त्यसपछि अतिरिक्त समयमा स्पेनले झन् आक्रामक खेल प्रस्तुत गर्यो।
अतिरिक्त समयको दोस्रो हाफ सुरु भएको केवल ३७ सेकेन्डमै स्पेनले निर्णायक प्रहार गर्यो। पेड्रो पोरोको क्रसलाई निको विलियम्सले उत्कृष्ट रूपमा मिलाइदिएपछि फेरान टोरेसले शक्तिशाली भलीमार्फत जाली चुमाए। यही गोलले स्पेनलाई दोस्रो विश्वकप उपाधितर्फ डोर्यायो।
गोल खाएपछि अर्जेन्टिनाले बराबरीका लागि अन्तिमसम्म संघर्ष गर्यो। कप्तान लियोनल मेस्सीले सेटपिस र कर्नरमार्फत अवसर सिर्जना गर्ने प्रयास गरे।
स्पेनले प्रतियोगिताभर देखाएको उत्कृष्ट लयलाई फाइनलमा पनि निरन्तरता दिँदै दोस्रो पटक विश्वकपको उपाधि जित्न सफल भयो। यसअघि सन् २०१० मा दक्षिण अफ्रिकामा पहिलो पटक विश्व च्याम्पियन बनेको स्पेनले १६ वर्षपछि फेरि विश्व फुटबलको सर्वोच्च ट्रफी उचाल्यो। फाइनलमा स्पेनले खेलको अधिकांश समय दबाब कायम राखेको थियो भने अर्जेन्टिनाले रक्षात्मक रणनीतिमा निर्भर रहँदै खेललाई पेनाल्टीसम्म पुर्याउने प्रयास गरेको थियो।
यससँगै लुइस डे ला फुएन्तेको नेतृत्वमा स्पेनले नयाँ पुस्तासहित विश्व फुटबलमा आफ्नो प्रभुत्व पुनः स्थापित गरेको छ।
