काठमाडौं। इङ्ग्ल्याण्डले फ्रान्सलाई आधा दर्जन गोल गर्दै हराएको छ। फिफा विश्वकप २०२६ अन्तर्गत आज सम्पन्न खेलमा फ्रान्समाथि ६-४ गोलअन्तरको जित निकाल्दै इङ्ग्ल्याण्डले विश्वकपमा तेस्रो स्थान सुरक्षित गरेको हो।
मियामीमा भएको खेलमा इंग्ल्यान्डले पहिलो हाफमै ४-० को विशाल अग्रता बनाए पनि फ्रान्सले दोस्रो हाफमा सशक्त पुनरागमनको प्रयास गरेको थियो।
इंग्ल्यान्डका लागि खेलको तेस्रो मिनेटमै कप्तान डेक्लान राइसले उत्कृष्ट गोल गर्दै अग्रता दिलाएका थिए। त्यसपछि १८औँ मिनेटमा एज्री कोन्साले हेडरमार्फत दोस्रो गोल गरे। ३७औँ र इन्जुरी समयको पहिलो मिनेटमा बुकायो साकाले दुई गोल थप्दै पहिलो हाफमै इंग्ल्यान्डलाई ४-० को बलियो स्थितिमा पुर्याए।
दोस्रो हाफमा भने फ्रान्स पूर्ण रूपमा फरक लयमा देखियो। ४८औँ मिनेटमा केलियन एमबाप्पेले गोल गर्दै पुनरागमनको संकेत दिए। त्यसको छ मिनेटपछि उनले ब्राडली बारकोलालाई गोलको अवसर सिर्जना गरिदिए। ६६औँ मिनेटमा एमबाप्पेले व्यक्तिगत दोस्रो गोल गर्दै खेल ४-३ मा ल्याए र फ्रान्सलाई खेलमा फर्काए।
फ्रान्सको पुनरागमनको प्रयासका बीच इंग्ल्यान्डले दबाब झेलेर पनि खेल आफ्नो पक्षमा राख्न सफल भयो। ८७औँ मिनेटमा साकाले पेनाल्टीमार्फत ह्याट्रिक पूरा गर्दै इंग्ल्यान्डको पाँचौँ गोल गरे। त्यसलगत्तै फ्रान्सका ओस्मान डेम्बेलेले गोल फर्काए पनि इन्जुरी समयको अन्तिमतिर जुड बेलिङ्घमले तीन डिफेन्डरलाई छल्दै शानदार गोल गरेपछि इंग्ल्यान्डको जित सुनिश्चित भयो।
साकाले ह्याट्रिकसहित तीन गोल गरे भने राइस, कोन्सा र बेलिङ्घमले एक-एक गोल थपे। फ्रान्सका लागि एमबाप्पेले दुई तथा बारकोला र डेम्बेलेले एक-एक गोल गरे।
यो जितसँगै इंग्ल्यान्डले विश्वकप २०२६ तेस्रो स्थानमा समाप्त गरेको छ भने फ्रान्स चौथो स्थानमा सीमित भयो। साथै इंग्ल्यान्डले विश्वकप इतिहासमा पहिलो पटक तेस्रो स्थानको प्लेअफ जित्दै आफ्नो अभियान सुखद रूपमा टुंग्याएको छ।
विश्वकपको उपाधिका लागि भने स्पेन र अर्जेन्टिना भिड्नेछन्।
