काठमाडौं। जेनजी आन्दोलनका क्रममा भएको सम्पत्ति क्षतिमा इन्स्योरेन्स कम्पनीमा सवा २३ अर्ब रुपैयाँको बीमा दाबी परेको छ।
नेपाल बीमा प्राधिकरणका अनुसार असोज २२ गतेसम्म डेढ दर्जन निर्जीवन बीमा कम्पनीमा २३ अर्ब २२ करोड ८७ लाख रुपैयाँको बीमा दाबी परेको हो। १४ वटा निर्जीवन बीमा कम्पनी र चारवटा लघु निर्जीवन बीमा कम्पनीमा कुल ३ हजार ९९ वटा बीमा दाबी परेको प्राधिकरणले जनाएको छ।
निर्जीवन बीमा कम्पनीमा परेको दाबीमा बुधबारसम्म १ अर्ब २९ करोड १९ लाख रुपैयाँ भुक्तानी भएको छ। यो रकम अग्रिम भुक्तानीसहितको हो।
प्राधिकरणका अनुसार निर्जीवन बीमा कम्पनीले क्षतिको सर्भे प्रतिवेदन तयारीका लागि बुधबारसम्म २ हजार ७०६ सर्भेयर खटाएका छन्। ३७४ सर्भेयरले प्रतिवेदन पेस गरेका छन्।
