२४ घण्टामै १०० डलरले घट्यो सुनको भाउ: पुटिन, सी र ट्रम्पको भेटले असर पर्ला?

बिजमाण्डू
२०८३ मंसिर २ गते १७:४३ | Nov 18, 2026
२४ घण्टामै १०० डलरले घट्यो सुनको भाउ: पुटिन, सी र ट्रम्पको भेटले असर पर्ला?

काठमाडौं । अन्तर्राष्ट्रिय बजारमा सुनको मूल्यमा पहिरो गएको छ। एकैदिन सुनको मूल्य १०० डलरले घटेको हो।

GBIME
Tata

आज अपराह्न ५:४० सम्म सुनको मूल्य प्रति औंस १०१ डलरले घटेर ३७६१.२८ डलर पुगेको हो। त्यसयता मूल्य घटबढ जारी छ।

बुधबार बिहानसम्म सुनको मूल्य १.२० प्रतिशतले घटेर प्रतिऔंस ३ हजार ८०३.२४ डलर कायम भएको थियो। यो सन् २०२५ अक्टोबरको सुरुवातयताकै न्यून मूल्य हो।

मंगलबार अपराह्न भने सुनको मूल्य ३८६१ बढीमा कारोबार भइरहेको थियो। सोमबार १३ महिनाकै न्यूनतम विन्दुमा पुगेको सुनको भाउमा मंगलबार सुधार देखिएको थियो।

आज दिनभरी सुनको मूल्य घटिरह्यो। बिहान १ प्रतिशतले घटेको मूल्य अपराह्नसम्म ३ प्रतिशतले ओरालो लागेको हो।

किन घटिरहेको छ भाउ ?

विश्लेषकहरूले सोमबार मूल्य घट्नुको मुख्य कारण निरन्तरको महँगी रहेको बताएका छन्। मंगलबार सामान्य सुधार देखाएको सुनको भाउ बुधबार ओरालो यात्रामै रह्यो।

उनीहरुका अनुसार महँगीले अमेरिकामा थप ब्याजदर वृद्धिको अपेक्षालाई बल पुर्‍याएको छ। अमेरिकी डलर बलियो बन्दा  र निरन्तरको मुद्रास्फीतिले मूल्य बढाउन सहयोग पुगेको हो।

त्यसमाथि आगामी महिना अमेरिकी केन्द्रीय बैंकले ब्याजदर बढाउने बढ्दो अपेक्षाबीच सुनको मूल्य बढ्ने अपेक्षा बजारले गरेको छैन। अक्टोबर महिनाको अमेरिकी मुद्रास्फीति ०.३ प्रतिशतको प्रक्षेपणविपरीत ०.४ प्रतिशत पुगेपछि अमेरिकी केन्द्रीय बैंकले आगामी डिसेम्बरमा ब्याजदर आधा प्रतिशतले बढाउने सम्भावना बलियो बनेको बजार बुझाइको छ।

अहिले सुनको मूल्य घटिरहनुको मुख्य कारण अमेरिकी केन्द्रीय बैंकले गर्न सक्ने सम्भावित निर्णय रहेको बताइन्छ।

बजारले आगामी दिनमा उच्च ब्याजदरको अपेक्षा गरेकाले डलर बलियो बनेको विज्ञहरुले बताएका छन्। यसले सुनको मूल्यमा थप गिरावटको जोखिम बढाएको बताइन्छ।

विश्लेषकहरुले आगामी डिसेम्बरमा अमेरिकाको फेडरल रिजर्भले ब्याजदर बढाउने लगभग निश्चित रहेको बताएका छन्। उच्च ब्याजदरले सामान्यतया बहुमूल्य धातुको मूल्यमा गिरावट ल्याउने गरेको छ।

फेडरल बैंकका अध्यक्ष केभिन वार्सले सोमबार सान फ्रान्सिस्कोस्थित फेडरल रिजर्भ बैंकमा सम्बोधन गरेका थिए। तर, उनले डिसेम्बरमा ब्याजदर बढाउने सम्भावनाबारे भने केही उल्लेख गरेनन्। यद्यपि, उनले एआईले अर्थतन्त्रमा महत्त्वपूर्ण प्रभाव पार्ने र भविष्यको मौद्रिक नीतिमा यसको गहिरो असर रहने धारणा राखेका थिए।

अर्कोतर्फ एनभिडियाका प्रमुख कार्यकारी अधिकृत जुसन हुआङको राजीनामापछि आर्टिफिसियल इन्टेलिजेन्स (एआई) को भविष्यबारे पनि बजारमा चिन्ता बढेको छ। यसले पनि बजारको जोखिम लिने मनोविज्ञानमा दबाब सिर्जना गरेको विश्लेषकहरुको मत छ।

चीनमा नजर

सुनको मूल्य थप घट्न सक्ने प्रक्षेपणले बजार त्रसित छ। यद्यपि, बजारमा केही सुधार आउने अपेक्षा विश्लेषकको छ।

चीनमा अमेरिकी राष्ट्रपति डोनाल्ड ट्रम्प, चिनियाँ राष्ट्रपति सी चिनफिङ र रसियाका राष्ट्रपति भ्लादिमिर पुटिन बीच भेट हुँदैछ।

यो वार्ता सकारात्मक भएर त्यसले बजारमा पनि केही सकारात्मकता ल्याउन सक्ने अनुमान गरिएको छ।

रसिया र युक्रेन युद्ध सुरु भएपछि पहिलोपटक ३ देशका राष्ट्रप्रमुखहरु सामुहिक भेटवार्तामा जुटिरहेका हुन्। यसमा खाडी तनाव, एआई लगायत अन्य वैश्विक विषयमा पनि छलफल चल्ने भनिएको छ।