काठमाडौं। आइपीओ निष्कासन रोकिँदा नेपाल धितोपत्र बोर्ड (सेबोन)मा निवेदनको चाङ लागेको छ।

सेबोनले बुधबार अध्यावधिक गरेको विवरण अनुसार आइपीओ निष्कासनका लागि सेबोनमा आवेदन दिने कम्पनीको संख्या ११२ पुगेको छ।

उत्पादन तथा प्रशोधन, हाइड्रोपावर, होटल तथा पर्यटन, अन्य र इन्स्योरेन्स कम्पनीले अंकित मूल्य र प्रिमियम गरेर ७१ अर्ब २९ करोड रुपैयाँको ४९ करोड ६९ लाख कित्ता सेयर निष्कासन गर्न आवेदन दिएका हुन्।

सेबोनले पछिल्लो ६ महिनायता कुनै कम्पनीलाई पनि आइपीओ अनुमति दिएको छैन। तत्कालीन अध्यक्ष सन्तोषनारायण श्रेष्ठले वैशाख पहिलो साता आइपीओ निष्कासन अनुमति दिएकामा त्यसयता कुनै कम्पनीले अनुमति पाएका छैनन्। जसका कारण पाइपलाइनमा रहेका कम्पनीको संख्या थपिंदै गएको हो।

असार दोस्रो साता सेबोन अध्यक्ष बनेका डा. गोपाल भट्टले कम्पनीको आइपीओ निष्कासन स्वीकृति अगाडि बढाएका छैनन्।