काठमाडौं। निक्षेपमा दिने र ऋणमा लिने ब्याज दरबीचको अन्तर (स्प्रेड) दर कटौतीले खुद ब्याज आम्दानी घटेपछि अधिकांश वाणिज्य बैंकहरुको नाफा गत वर्षको तुलनामा घटेको छ।

चालु आर्थिक वर्षको दोस्रो त्रैमासिक वित्तीय विवरण प्रकाशित गरेका अधिकांश बैंकहरुको नाफा घटेको छ। बिहीबार १७ बैंकले वित्तीय विवरण प्रकाशित गरेका छन्, यसमध्ये चार वटाको नाफा बढेको छ। बाँकी जम्मैको घटेको छ।

आजसम्म कुल २५ बैंकले वित्तीय विवरण सार्वजनिक गरिसकेका छन्। यसमध्ये १६ वटा बैंकको नाफा घटेको छ। अहिले २७ बैंक सञ्चालनमा छन्। यसमध्ये दुई बैंकले नाफा सार्वजनिक गर्न बाँकी छ। एनआइसी एसिया र राष्ट्रिय वाणिज्य बैंकले वित्तीय विवरण सार्वजनिक गरेका छैनन्। 

नाफा सवा प्रतिशतदेखि साढे ६२ प्रतिशतसम्म घटेको छ। विदेशी संयुक्त लगानीका सबै बैंकको नाफामा गिरावट आएको छ। नाफा बढ्नेमा एनएमबि अग्रपङ्तिमा छ। बैंकको ४७.६९ प्रतिशतले नाफा बढेको छ। यसपछि प्राइम बैंकको ३९.४० प्रतिशत, ग्लोबल आइएमइ बैंकको ३७.३२ र मेगा बैंकको ३७.२८ प्रतिशतले नाफा बढेको छ।

कोभिड-१९ को असरका कारण एकातिर ऋण उठ्तीमा समस्या भयो भने अर्कोतिर राष्ट्र बैंकले स्प्रेडमा निकै कडाइ गरेको छ। स्प्रेड दर ४.४ प्रतिशतभन्दा तल ल्याउनु परेका कारण खुद ब्याज आम्दानी प्रभावित भएर नाफा घटेको देखिन्छ।

नबिल र माछापुच्छ्रे बैंकको नाफा २ प्रतिशत हाराहारीले घटेको छ। बाँकीको १० प्रतिशतभन्दा बढीले घटेको छ। सर्वाधिक नाफा घट्नेमा हिमालयन बैक छ। बैंकको साढे ६२ प्रतिशतले नाफा घटेको छ। यसपछि नेपाल एसबीआइको साढे ४८ प्रतिशतले नाफा घटेको छ। 

यद्यपि रकमका हिसाबले सर्वाधिक नाफा ग्लोबल आइएमइ बैंकको छ। उक्त बैंकले २ अर्ब ३७ करोड रुपैयाँ नाफा गरेको छ। यसपछि नबिलले २ अर्ब एक करोड गरेको छ। प्राइम बैंकको एक अर्ब ८१ करोड, एनएमबि बैंकको एक अर्ब ६१ करोड, कृषि विकास बैंकको एक अर्ब ३२ करोड र मेगा बैंकको एक अर्ब ३० करोड रुपैयाँ नाफा गरेका छन्। 

रकमका हिसाबले सिभिल बैंकको नाफा जम्मा २० करोड २८ लाख रुपैयाँ छ । यसपछि सेञ्चुरी, नेपाल एसबीआइ र एनसीसी बैंक छन्। यसपाली हिमालयनलाई बैक अफ काठमाण्डूले नाफामा जितेको छ। बैंक अफ काठमाण्डू, स्ट्यान्डर्ड चार्टर्डलाई माछापुच्छ्रेले उछिनेको छ। 

बैंक अफ काठमाण्डूले ७० करोड ८५ लाख, चार्टर्डले ७२ करोड ७६ लाख, माछापुच्छ्रे बैंकले ८० करोड २७ लाख रुपैयाँ नाफा गरेको छ। लक्ष्मी बैंकको नाफा ८० करोड ७१ लाख छ भने सिद्धार्थको ९१ करोड ८७ लाख छ। योभन्दा बढी एभरेष्टको ९६ करोड १९ लाख छ। एभरेष्टलाई कान्छोमध्येको मेगा बैंकले उछिनेको छ। मेगाले एक अर्ब ३० करोड नाफा गरेको छ। 

बिहीबारअघि सनराइज, सानिमा, प्रभु, नेपाल बैंक, नेपाल बंगलादेश बैंक, कुमारी बैंक, सिटिजन्स् बैंक र नेपाल इन्भेष्टमेन्ट बैंकले वित्तीय विवरण सार्वजनिक गरिसकेका छन्। यसमध्ये इन्भेष्टमेन्ट, नेपाल बैंक, सानिमा बैंकको घटेको छ। बाँकी सिटिजन्स, कुमारी, नेपाल बंगलादेश बैंक, प्रभु,  सनराइज बैंकको बढेको छ।

वित्तीय विवरण सार्वजनिक गरेका अधिकांश बैंकको खराब ऋण बढेको छ। केहीले डुबेको ऋण उठाएर नाफा बढाएका छन् तर सँगसँगै खराब ऋणको मात्रा बढ्दो पनि देखिएको छ।