काठमाडौं। बीमा कम्पनीले चालु आर्थिक वर्ष पहिलो त्रैमासमा व्यापार बढाएका छन्। नेपाल बीमा प्राधिकरणका अुनसार असोज मसान्तसम्म जीवन र निर्जीवन बीमा कम्पनीले बीमा शुल्क आर्जन बढाएका हुन्।

तीन महिनामा तीन वटा माइक्रो इन्स्योरेन्ससहित १७ वटा जीवन बीमा कम्पनीले ५० अर्ब ३६ करोड रुपैयाँ बीमा शुल्क संकलन गरेका छन्। कम्पनीहरुले आर्जन गरेको यो मुनाफा पोहोर सोही अवधिको तुलनामा २१.९५ प्रतिशत धेरै हो।

बीमा कम्पनीले पोहोर पहिलो तीन महिनामा ४१ अर्ब ३० करोड रुपैयाँ प्रिमियम आर्जन गरेका थिए।

प्राधिकरणका अनुसार १४ वटै ठूला जीवन कम्पनीको व्यवसाय बढेको छ। राष्ट्रिय जीवन बीमा कम्पनीले सबैभन्दा धेरै २२२.४९ प्रतिशतले व्यवसाय बढाएको छ। नेपाल लाइफ इन्स्योरेन्सले सबैभन्दा धेरै १३ अर्ब ४५ करोड रुपैयाँ बीमा शुल्क आर्जन गरेको छ।

जीवन बीमा कम्पनीले दुई आर्थिक वर्षको पहिलो त्रैमासमा आर्जन गरेको बीमा शुल्क (रु लाखमा)

निर्जीवन बीमा कम्पनीको व्यवसाय पनि बढेको छ। कम्पनीहरुले यो आर्थिक वर्ष असोजसम्म १२ अर्ब ९२ करोड रुपैयाँ बीमा शुल्क आर्जन गरेका छन्।

निर्जीवन बीमा कम्पनीले आर्जन गरेको बीमा शुल्क पोहोर सोही अवधिको तुलनामा ११.६७ प्रतिशत धेरै हो। निर्जीवन बीमा कम्पनीले पोहोर साउनदेखि असोजसम्म ११ अर्ब ५७ करोड रुपैयाँ प्रिमियम आर्जन गरेका थिए।

ओरियन्टल र राष्ट्रिय बीमा कम्पनीबाहेकको व्यापार बढेको हो। सगरमाथा लुम्बिनीले सबैभन्दा धेरै १ अर्ब ४९ करोड रपैयाँ बीमा शुल्क आर्जन गरेको छ। व्यापार धेरै बढाउनेमा एनएलजी इन्स्योरेन्स छ। उसले ३६.३५ प्रतिशतले प्रिमियम आर्जन बढाएको हो।

निर्जीवन बीमा कम्पनीले पहिलो त्रैमासमा आर्जन गरेको बीमा शुल्क (रु लाखमा)