BIZMANDU
www.bizmandu.com

निजामती जलविद्युत कम्पनीको प्रस्ताव तयार, ४१ प्रतिशत सेयर कर्मचारीलाई

२०६९ असार २३

निजामती जलविद्युत कम्पनीको प्रस्ताव तयार, ४१ प्रतिशत सेयर कर्मचारीलाई
निजामती जलविद्युत कम्पनीको प्रस्ताव तयार, ४१ प्रतिशत सेयर कर्मचारीलाई


काठमाडौं । निजामती कर्मचारीलाई ४१ प्रतिशतको सेयर प्रस्ताव गर्दै निजामती जलविद्युत कम्पनी प्रस्ताव गरिएको छ । पाँच अर्ब रुपैयाँ अधिकृत पुँजी भएको यो कम्पनीमा तत्काल २२ करोड रुपैयाँ चुक्ता पुँजी राख्ने प्रस्ताव सरकारले गठन गरेको यससम्वन्धी कार्यादलले गरेको छ ।
शेयरधनीबाट शेयरपुँजी चुक्ता नहुन्जेलसम्मका लागि उर्जा मन्त्रालयबाट सात करोड, अर्थबाट पाँच करोड, महालेखा नियन्त्रकको कार्यालयबाट पाँच करोड र नेपाल विद्युत प्राधिकरणबाट पाँच करोड जुटाएर काम थाल्ने प्रस्ताव कार्यदलले गरेको छ । कार्यदलले उर्जालाई १४ प्रतिशत, अर्थ, महालेखा र प्राधिकरणलाई १० प्रतिशतका दरले शेयर दिन प्रस्ताव गरेको छ ।
त्यसैगरी परियोजनाको जिल्लावासीलाई पाँच प्रतिशत र सर्वसाधरणलाई १० प्रतिशत सेयर जारी गर्ने प्रस्ताव गरेको छ । कार्यदलले प्रत्येक निजामती कर्मचारीले एक सयदेखि साढे दुई हजार कित्तासम्म सेयर लिन पाउने व्यवस्था सिफारिश गरेको छ ।
उर्जा मन्त्रालयले निजामती जलविद्युत कम्पनी स्थापनाका लागि कानूनी, प्राविधिक र वित्तिय अवधारणा पेश गर्न कार्यदल गठन गरेको थियो । कार्यदलले निजामती कर्मचारी सेवा ऐन र नियमावलीमा  परिवर्तन गर्न पनि सरकारलाई सिफारिश गरेको छ ।
सरकारले बजेट मार्फत निजामती कर्मचारीको सहभागितामा जलविद्युत कम्पनी स्थापना गर्ने र त्यस्तो कम्पनीमा कर्मचारीबाट वार्षिक १२ किस्तामा कम्तिमा एक महिनाको तलव शेयरमा लगानी गर्ने प्रस्ताव गरेको थियो । कार्यदलले कर्मचारीको संलग्नतामा दुईवटा मझौता जलविद्युत आयोजना निर्माण गर्न सकिने जानकारी दिएको छ ।
त्यसबाहेक कार्यदलले खुला प्रतिश्पर्धाबाट प्रमुख कार्यकारी अधिकृत र अन्य कर्मचारीको व्यवस्था गर्नुपर्ने प्रस्ताव समेत गरेको छ । प्रमुख नआउँदासम्म उर्जा मन्त्रालयमा कार्यरत सहसचिवलाई कम्पनीको जिम्मा दिने प्रस्ताव गरेको छ ।
कार्यदलले सात जनाको सञ्चालक समिति बनाउने प्रस्ताव गरेको छ । त्यसमध्ये उर्जा, अर्थ र प्राधिकरणबाट एक÷एक जना, कर्मचारीबाट दुई जना, सर्वसाधरण र जिल्लावासीबाट एक जना तथा एक जना स्वतन्त्र सञ्चालक नियुक्त गर्नुपर्ने प्रस्ताव गरेको छ । कार्यदलले निजामती जलविद्युत कम्पनीको प्रवन्ध पत्र र नियमावलीको प्रस्ताव समेत गरेको छ।
गत बैसाखमा उर्जा मन्त्रालयले विद्युत विकास विभागका उपमहानिर्देशक सञ्जय शर्माको नेतृत्वमा कार्यदल गठन गरेको थियो । कार्यदलले म्यान्डेट पाए पनि तत्काल सुरु गर्न सकिने जलविद्युत परियोजनाको नाम भने दिएको छैन् । तर सुरुमा २० देखि ३० मेघावाट र दोस्रो चरणमा ७० देखि ८० मेघावाटको परियोजना बनाउन भने सिफारिश गरेको छ ।

Tata
GBIME
Nepal Life