ठूला बैंकको सेयर मूल्य बढ्यो, इन्सुरेन्स कम्पनीको चाँदी कटाइ, बुटवल पावर बढ्यो

काठमाडौं । साढे १२ प्रतिशत बोनस सेयर र पाँच प्रतिशत नगद लाभांस प्रस्ताव गरेको नेपाल एसबीआई बैंकको सेयर मूल्य विहिवार ११ रुपैयाँले बढेको छ । विहिवारको वृद्धिपछि नेपाल एसबिआईको प्रतिकित्ता सेयर मूल्य ५८० रुपैयाँ पुगेको छ । विहिवार स्टकमा अधिकांश ठूला बाणिज्य बैंकको सेयर मूल्यमा समेत वृद्धि भयो । चार्टड बैंकको सेयर मूल्यमा १४ रुपैयाँले वृद्धि भएप्छि प्रतिकित्ता १७८० रुपैयाँ पुगेको छ । हिमालयन बैंकको प्रतिकित्ता १० रुपैयाँले सेयर मूल्य बढेर ६९० रुपैयाँ पुग्यो ।
ठूला बैंकको सेयर मूल्य बढेपछि नेप्सेमा बैकिङ समूह १.२४ अंकले बढ्यो । विहिवार जलविद्युत समूहमा बुटवल पावरको सेयर मूल्यमा ठूलै वृद्धि भयो । बुटवल पावरको प्रतिकित्ता २० रुपैयाँले सेयर मूल्य बढेर प्रतिकित्ता ७१० रुपैयाँ पुग्यो । अरुण भ्यालीको सेयर मूल्य १ रुपैयाँ, चिलिमेको सेयर मूल्य दुई रुपैयाँले बढ्यो । तीन कम्पनीको सेयर मूल्य बढ्दा जलविद्युत समूह ८.०९ अंकले बढ्यो ।
नेपाल स्टकमा विहिवार पनि इन्सुरेन्स समूहको नै दवादव रह्यो । एशियन लाइफको १६ रुपैयाँले, जेनरल फाइनान्सको १२ रुपैयाँ, लाइफ इन्सुरेन्सको ३९ रुपैयाँ, नेपाल लाइफ इन्सुरेनस ८८ रुपैयाँ नेशनल लाइफ इन्सुरेन्स १६ रुपैयाँ, प्राइम लाइफ इन्सुरेन्स १९ रुपैयाँले सेयर मूल्य बढ्यो । शिखर इन्सुरेन्सको सेयर मूल्य भने १५ रुपैयाँ र प्रुडेन्सियल इन्सुरेन्सको १२ रुपैयाँले सेयर मूल्य घटेर कारोवार भयो ।
इन्सुरेन्स कम्पनीको चाँदी कटाइ भएपछि विहिवार नेप्सेमा समूहको सूचकांक २२ अंकले बढ्यो । बैंक, इन्सुरेन्स र जलविद्युत समूहको सूचकांक बढेपछि विहिवार नेप्से १.२४ अंकले बढ्यो ।