एडिनवर्ग । एक वर्ष अघि आत्मदाह गर्ने प्रयास गरेकी नेपाली महिलालाई बेलायतको अदालतले एक वर्षको काराबास सजाय छुट दिंदै रिहा गरेको छ ।
परिवार सहित वेलायतको एडिनवर्ग बस्दै आएकी ३० वर्षिय यमकला सापकोटाले गत जुन २८ तारिकमा आफ्नै फ्ल्याटमा आत्मदाह गर्ने प्रयास गरेकी थिईन । अनलाईन संचारमाध्यमहरुका अनुसार सवारी चालक अनुमति पत्र लिन चौथो पटक गरेको प्रयास असफल भएपछि यमकलाले आत्मदाह गर्ने प्रयास गरेकी थिइन ।
सवारी चालक अनुमतिका लागि ९० वटा ड्राईभिङ क्लास लिइसकेकी यमकलाले चौथो पटकमा पनि ट्रायल पास गर्ने सकेकि थिईनन् । असफलताका कारण तनावमा रहेकी यमकलाको श्रीमानसँग समेत भनाभन भएको अखवारहरुले उल्लेख गरेका छन् । स्थानीय रेष्टुरेष्टमा काम गर्दै आएका यदुमणी सापकोटाले यमकलासँग भनाभन गर्दा अप्रिय बचन लगाएका थिए । श्रीमान काममा हिँडेपछि नेपाली भाषामा सुसाईड नोट लेख्दै उनले आफ्नै शरिरमा आगो लगाएकी हुन् । सुसाईड नोटमा उनले आफुलाई मर्नु नै उपयु्क्त हुने ठानेको र अरु कसैको दोष नभएको उल्लेख गरेकी थिइन ।
लगातारको असफलताबाट विक्षिप्त भएको बेला मर्नु नै उपयु्क्त ठानेर आत्मदाह गर्ने निर्णय गरेको यमकलाले बताइन । एक छिमेकिले आगो नियन्त्रकलाई खवर गरेपछि उनको उद्धार भएको थियो । अचेत अवस्थामा भएकी यमकलाको अनुहारको १८ प्रतिसत भाग डढेको थियो भने टाउको, घाँटी, काँध, दाहिने पाखुरा र पिठ्युँ लगायत शरीरका अन्य भाग पनि डढेको थियो । केहि महिनाको आराम एवं सघन उपचारपछि उनको अवस्था सामान्य भएको थियो ।
स्थानीय अदालतले यमकलालाई आफ्ना छोराछोरीसँग भेट्न समेत बन्देज लगाउँदै दुई वर्षे कारावास सजाय तोकेको थियो । बयान दिने क्रममा यकमलाले आफुले आवेगमा निर्णय लिएको बताउँदै अरुलाई हानी नोक्सानी गर्ने उद्देश्यले आत्मदाह गर्ने प्रयास नगरेको बताएकी थिइन् । कारावास बसाइका क्रममा उनको व्यवहार राम्रो देखेपछि अदालतले प्रहरीको निगरानीमा छोराछोरीलाई भेटनसक्ने गरी प्रतिबन्ध फुकुवा गरेको थियो ।
अगस्ट ३१ मा सोहि अदालतले एक वर्षे कारागार जीवनमा राम्रो छवि प्रदर्शन गरेको तथा त्यस अघि कुनै पनि अपराध अभियोग नलागेको भन्दै यमकलाको बाँकी सजाय माफ गरिदिएको हो । सजाय माफी पाएपछि उनी निक्कै खुसी भएकी छिन् । उनका श्रीमान यदुमणीले खुसी ब्यक्त गर्दै भने, हाम्रो परिवार फेरी एक भएको छ । मलाई धेरै खुसी लागेको छ । यमकलाले पनि आवेगमा घातक निर्णय लिएकोमा पश्चाताप गरेकी छन् ।
आठ वर्ष अघि श्रीमान सँगै बेलायत पुगेकी यमकला परिवार सहित उतै बस्छीन् । परिवारमा दम्पती वाहेक उनीहरुका तीन सन्तान पनि छन् । स्कट्सम्यान