BIZMANDU
www.bizmandu.com

भाजुरत्न फाइनान्स भिबोर बिकास बैंकसँग मर्ज, आजबाट एकीकृत कारोवार

२०६९ भदौ १७

भाजुरत्न फाइनान्स भिबोर बिकास बैंकसँग मर्ज, आजबाट एकीकृत कारोवार
भाजुरत्न फाइनान्स भिबोर बिकास बैंकसँग मर्ज, आजबाट एकीकृत कारोवार


काठमाडौं । भिबोर विकास बैंक र भाजुरत्न फाइनान्स एक भएका छन् । यी दुई वित्तीय संस्थाले आइतवार (आज)बाट एकीकृत कारोवार सुरु गरेका छन् । एकीकृत भएपछि पनि यी दुई संस्थाले भिबोर विकास बैंकको रुपमा कारोवार गरेका छन् । दुई संस्था मर्ज हुने निर्णय दुवै कम्पनीको विशेष साधरणसभाबाट गरिएको थियो । राष्ट्र बैंकबाट मर्ज हुन अनुमति पाएका यी दुई संस्थाले कम्पनी रजिष्ट्रारको कार्यालयबाट समेत एकीकृत हुने अनुमति पाएका छन् । अब साविकमा रहेको भाजुरत्न फाइनान्स एण्ड सेभिङ्ग कम्पनीको सम्पत्ति तथा दायित्व मर्ज भएको भिबोर विकास बैंकसँग रहने भिवोर विकास बैंकका प्रमुख कार्यकारी अधिकृत अजय घिमिरेले जानकारी दिए ।
दुवै कम्पनी मर्ज भएपछि ७५ करोड चुक्ता पुँजी भएको विकास बैंक बन्नेछ । भिवोरको अहिले ६८ करोड १७ लाख रुपैयाँको चुक्ता पुँजी छ भने भाजुरत्नसँग सात करोड ८० लाख रुपैयाँको चुक्ता पुँजी छ ।
नेपाल स्टकमा सूचीकृत यी दुई कम्पनीमध्ये भिवोरको पछिल्लो कारोवार ११२ रुपैयाँमा भएको थियो भने भाजुरत्नको ११६ रुपैयाँमा भएको थियो । मर्ज भएपछि कम्पनीको चुक्ता पुँजी बढाएर एक अर्ब ३६ करोड पुर्याउने लक्ष्य राखिएको छ । भिवोरमा भाजुरत्नको प्रमुख प्रवद्र्धक ज्योती समूहले १४ करोड ८० लाख रुपैयाँ र भिवोरका प्रवद्र्धकले २० करोड ८० लाख रुपैयाँ थप्ने योजना छ ।
कम्पनीले थप २४ करोड १० लाख रुपैयाँ मर्जर वा हकप्रद सेयर जारी गरेर उठाउने योजना बनाएको छ । योजना अनुसार काम भए भिवोरमा संस्थापकको ६१ प्रतिशत र सर्वसाधरणको ३९ प्रतिशत सेयर रहनेछ ।
घरजग्गा कारोवारलाई केन्द्रमा राखेको भिवोर दुई वर्ष अघिदेखि संकटमा छ । घरजग्गा ओरालो लागेपछि सुरु भएको संकट अहिले केही जारी छ । एक साता अघि मात्रै भिवोरले रविभवनमा भएको जग्गा प्रभाकरण सम्शेर राणाको कम्पनी सौर्य हाउजिङलाई एक अर्ब ३७ करोड ५० लाख रुपैयाँमा विक्री गरेको थियो । भिवोरले अन्य ठाउँका सम्पत्ती समेत विक्री गर्दै आएको छ । कम्पनीले अब आफूलाई विशुद्ध बैकिङमा केन्द्रित गर्ने योजना बनाएको छ ।

Tata
GBIME
Nepal Life