BIZMANDU
www.bizmandu.com

एनसेलका ग्राहकलाई विकिपिडियामा सित्तै पहुँच, ‘ज्ञानको भण्डार’ बढाउन नयाँ स्किम

२०७१ बैशाख २३

एनसेलका ग्राहकलाई विकिपिडियामा सित्तै पहुँच, ‘ज्ञानको भण्डार’ बढाउन नयाँ स्किम
एनसेलका ग्राहकलाई विकिपिडियामा सित्तै पहुँच, ‘ज्ञानको भण्डार’ बढाउन नयाँ स्किम


काठमाडौं । मोबाइल सेवा प्रदायक कम्पनी एनसेलले आफ्ना ग्राहकलाई डाटा सेवामा विकिपिडिया सित्तैमा चलाउन दिने भएको छ । विश्वकै ठूलो अनलाइन पुस्तकालय विकिपिडियाको सञ्चालक विकिमिडिया फाउण्डेसनसँग सहकार्य गर्दै ‘विकिपिडिया जिरो’ स्किम सञ्चालनमा ल्याएको कम्पनीले जनाएको छ । 
बुधबारदेखि यो सेवा सुरु हुने कम्पनीले मंगलबार आयोजित पत्रकार सम्मेलनमा जानकारी दिइयो । अब एनसेलबाट इन्टरनेट चलाउने ग्राहकले निःशुल्क विकिपीडिया चलाई त्यसमा रहेका करौडौँ जानकारीमुलक लेख तथा अध्ययन सामग्री हेर्न र पढ्न सक्नेछन् । साथै, विकिपिडियामा नेपाल बारे जानकारी अपलोड गर्न समेत अब सजिलो हुने कम्पनीका प्रमुख कार्यकारी अधिकृत एरिम टाइलानलरले बताए । 
‘मोबाइल सेवा प्रदायकको काम भ्वाइस र डाटा सेवा दिने मात्र होइन’ उनले भने ‘यसले समाजसँग जोडिएका कैयन् अरु काम पनि गर्न सक्छ र हामीले ‘विकिपिडिया जिरो’ मार्फत् त्यसैको सुरुवात गरेका हौं । नियामक निकाय नेपाल दूरसञ्चार प्राधिकरणबाट अनुमति पाए किसानलाई डाटा दिएर बजार र मूल्यमा सहजता ल्याउने बारे समेत आफूहरुले काम गर्न सक्ने उनले बताए । एनसेलको प्यारेन्ट कम्पनी टेलियासोनेराले अजरबैजानमा सञ्चालन गरेको अजरसेलले किसानलाई सित्तैमा डाटा सेवा दिएपछि उनीहरुको बजार र मूल्यमाथि पहुँच बढेको उनको भनाइ छ । 
विकिपिडिया संसारकै ठुलो अनलाइन विश्वकोष हो । प्रत्येक महिना ५० करोड व्यक्तिले विकिपिडिया चलाउने तथ्याङ्क छ । विश्वका दुई सय ८७ भाषामा तीन करोड भन्दा बढी लेख/सामग्री विकिपिडियामा उपलब्ध छन् । विश्वभरका ८० हजार स्वयंसेवक लेखकले यी लेख/रचना तयार गरेका हुन् । यस्तो विशाल सन्दर्भ सामग्रीमा सहज पहुँचले नेपालको शैक्षिक र चेतनाको स्तरमा समेत ठुलो योगदान पुग्ने कम्पनीको कर्पोरेट कम्युनिकेसन निर्देशक सञ्जु कोइरालाले बताइन् । 
प्राविधिक कारणले ओपेरा मिनी, ब्ल्याकबेरी तथा अरु प्रोक्सी ब्राउजर चलाउने ग्राहकले भने ‘जिरो विकिपिडिया’ सेवा नपाउने कम्पनीले जनाएको छ । यस्ता सेट/ब्राउजरबाट विकिपिडिया चलाउँदा नियमित डाटा शुल्क लाग्ने जनाइएको छ । 

Tata
GBIME
Nepal Life