सिद्धार्थ बैंकको नाफा २७ प्रतिशत र नबिलको सात प्रतिशतले वृद्धि, दोस्रो त्रैमाश भन्दा ५० प्रतिशत

२०७१ बैशाख १९

काठमाडौं। चालु आवको तेस्रो त्रैमाशमा सिद्धार्थ बैंकको नाफा २७ प्रतिशतले र नबिल बैंकको नाफा सात प्रतिशतले बढेको छ ।

सिद्धार्थ बैंकको गत आवको यही अवधिमा २८ करोड ४१ लाख रुपैयाँ नाफा भएकोमा यस बर्षभने ३६ करोड ३६ लाख रुपैयाँ नाफा भएको छ । बैंकको नाफा दोस्रो त्रैमाशको तुलनामा भने करिब ५० प्रतिशतले बढेको हो ।

गत आवको यो अवधिको तुलनामा बैंकको खुद व्याज आम्दानी भने १४ प्रतिशतले मात्र बढ्न सकेको छ । गत बर्ष ७७ करोड २५ लाख यस्तो आम्दानी भएको बैंकको ८८ करोड चार लाख रुपैयाँ पुगेको छ । बैंकको त्रैमाशमा तेस्रो त्रैमाशमा स्प्रेडदर ४.१७ मा रहेको छ । बैंकको अघिल्लो बर्षको तुलनामा व्याज आम्दानी साढे चार प्रतिशतले बढ्यो भने व्याज लागत एक प्रतिशतले घट्यो ।

अघिल्लो बर्षको तुलनामा बैंकको कर्जा करिब १४ प्रतिशतले बढेर २५ अर्ब ३१ करोड रुपैयाँ पुगेको छ, निक्षेप पनि १९.२७ प्रतिशतले बढेर ३२ अर्ब ४८ करोड रुपैयाँ पुग्यो । बैंकको रियल स्टेटमा भएको कर्जा लगानी गत बर्षको तुलनामा ११.४६ प्रतिशतले घटेर तीन अर्ब ३२ करोडमा सिमित भएको छ । यो कुल कर्जाको आधारमा भने करिब १३.१५ प्रतिशत लगानी हो । बैंकको कर्जा निक्षेप अनुपात ७५.२८ रहेको छ ।

बैंकले बैदेशिक बिनिमयबाट १० करोड २२ लाख नाफा कमाएको छ । बैंकको कर्मचारी र अन्य खर्च २२ प्रतिशतले घटेको छ । बैंकले यसअघि सम्भावित जोखिम बापत छुट्याएको ८१ लाख फिर्ता ल्याएको छ । बैंकले यसपटक सम्भावित जोखिम बापतको व्यवस्था भने १५ प्रतिशतले कम गरेर २४ करोड ५८ लाख बनाएको छ । त्यस्तै, बैंकको कुल कर्जामा खराब कर्जाको हिस्सा ३.१४ प्रतिशत रहेको छ भने सम्भावित जोखिम वापत १०६ प्रतिशत रकम छुट्याएको छ । बैंकको सञ्चालन नाफा भने २१ प्रतिशतले बढेर ५५ करोड ६३ लाख रुपैयाँ पुगेको छ ।

बैंकको पुजी कोष पर्याप्तता ११.७१ रहेको छ । बैंकको कोष लागत ४.५९ बाट घटेर ३.४५ मा सिमित भएको छ । बैंकको बेस रेट ५.८०, प्रतिसेयर आम्दानी २६.७४, मूल्य आम्दानी अनुपात २१.२१ र प्रतिसेयर नेटवर्थ १५८ रुपैयाँ रहेको छ ।

त्यस्तै, नबिल बैंकको गत आवको यही अवधिमा एक अर्ब ५३ करोड ३६ लाख रुपैयाँ नाफा भएकोमा यस बर्षभने एक अर्ब ६४ करोड १९ लाख रुपैयाँ नाफा भएको छ । बैंकको नाफा दोस्रो त्रैमाशको तुलनामा भने करिब ५५ प्रतिशतले बढेको हो ।

गत आवको यो अवधिको तुलनामा बैंकको खुद व्याज आम्दानी भने आठ प्रतिशतले मात्र बढ्न सकेको छ । गत बर्ष दुई अर्ब ५२ करोड यस्तो आम्दानी भएको बैंकको दुई अर्ब ७२ करोड रुपैयाँ पुगेको छ । बैंकको खुद व्याज आम्दानी घट्नुमा स्प्रेड दर (निक्षेमा दिने व्याज र कर्जाको व्याज बीचको अन्तर) कम गरिनु पनि देखिएको छ । बैंकले दोस्रो त्रैमाशमा आठ कायम गरेको स्प्रेडदर तेस्रो त्रैमाशमा झारेर ७.१५ मा सिमित बनाएको छ । बैंकको अघिल्लो बर्षको तुलनामा व्याज आम्दानी ०.४४ प्रतिशतले र व्याज लागत पनि १३ प्रतिशतले घट्यो ।
अघिल्लो बर्षको तुलनामा बैंकको कर्जा करिब १९ प्रतिशतले बढेर ५३ अर्ब ५१ करोड रुपैयाँ पुगेको छ, निक्षेप पनि २८ प्रतिशतले बढेर ७३ अर्ब ९० करोड रुपैयाँ पुग्यो । बैंकको रियल स्टेटमा भएको कर्जा लगानी गत बर्षको तुलनामा सात प्रतिशतले बढेर चार अर्ब ६७ करोडमा सिमित भएको छ । यो कुल कर्जाको आधारमा भने करिब आठ प्रतिशत लगानी हो । बैंकको कर्जा निक्षेप अनुपात ७२.५१ रहेको छ ।

बैंकले बैदेशिक बिनिमयबाट ३९ करोड ५९ लाख नाफा कमाएको छ । बैंकको कर्मचारी र अन्य खर्च १५ प्रतिशतले बढेको छ । बैंकले यसअघि सम्भावित जोखिम बापत छुट्याएको २८ करोड चार लाख फिर्ता ल्याएको छ । बैंकले यसपटक सम्भावित जोखिम बापतको व्यवस्था भने १७.३५ प्रतिशतले कम गरेर ५६ करोड ३६ लाख बनाएको छ । त्यस्तै, बैंकको कुल कर्जामा खराब कर्जाको हिस्सा २.९६ प्रतिशत रहेको छ भने सम्भावित जोखिम वापत ९८ प्रतिशत रकम छुट्याएको छ । बैंकको सञ्चालन नाफा भने साढे सात प्रतिशतले बढेर दुई अर्ब २५ करोड रुपैयाँ पुगेको छ ।

बैंकको पुजी कोष पर्याप्तता १२.४४ रहेको छ । बैंकको कोष लागत ४.५९ बाट घटेर ३.४५मा सिमित भएको छ । बैंकको बेस रेट ५.८, प्रतिसेयर आम्दानी ७२.५१, मूल्य आम्दानी अनुपात २७.५१ र प्रतिसेयर नेटवर्थ २७३ रुपैयाँ रहेको छ ।