व्यवसाय गर्ने महिलालाई बिओकेको उद्यमशील कर्जा, तीन लाखसम्म ऋण, तीन वर्षे चुक्ता अवधि

काठमाडौं । बैंक अफ काठमाण्डूले उद्योग व्यवसाय गर्न चाहने महिलाका लागि महिला उद्यमशील कर्जा योजना ल्याएको छ । यो योजनाअनुसार बैंकमा गृहलक्ष्मी वचत खाता, ग्रामीण महिला वचत खाता र माई च्वाइस वेमन सेभिङ्ग खाता भएका महिलाले ‘महिला उद्यमशील कर्जा’ लिई व्यवसाय सुरु गर्न वा भएको व्यवसाय बढाउन सक्ने बैंकले सोमवार जारी प्रेस विज्ञप्तिमा छ ।

यस सेवा अन्तर्गत महिलाले तीन लाख रुपैयाँसम्म सरल प्रक्रियाबाट कर्जा लिन सकिने र तीन वर्षसम्ममा कर्जा भुक्तानी गर्ने प्रावधान राखिएको बैंकले जानकारी दिएको छ । महिला उद्यमशील कर्र्जा उपभोग गर्ने महिलाको व्यक्तीगत दुर्घटना बीमा समेत बैंकको तर्फबाट गरिदिने व्यवस्था गरिएको बैंकले जानकारी दिएको छ ।
महिला उद्यमशील कर्जाको सोमवार बैंकका प्रमुख कार्यकारी अधिकृत अजय श्रेष्ठले शुभारम्भ गर्दै वेमन्स फाउण्डेशन नेपालका अध्यक्ष रेणु शर्मा र महासचिब कमला उप्रेतीलाई सम्मान गरे । विषम आर्थिक अवस्थाका वावजुद उद्योग व्यवसाय सुरु गरेर अन्य महिलालाई समेत रोजगारी प्रदान गरेका शर्मा र उप्रेतीलाई सम्मान गरिएको हो ।
यसै गरी बैंकले गृहलक्ष्मी वचत खाता, ग्रामीण महिला वचत खाता र माइ च्वाइस सेभिङ्ग खाता खोल्ने पहिलो ग्राहकलाई पनि मायाको चिन्ह प्रदान गरिएको बैंकले जारी प्रेस विज्ञप्तिमा छ । बैंक अफ काठमाण्डूका मुलुकका दुर्गम क्षेत्रसहित विभिन्न भागमा ५० शाखा ५६ एटीएम र आठ विस्तारित सेवा काउण्टर छन् ।