सुन तोलामा दुई सय रुपैयाँ महँगो, पुग्यो ५१ हजार रुपैयाँ, चाँदीको चमक भने अझै फर्किएन्

काठमाडौं । मंगलवार तोलामा थप दुई सय रुपैयाँ बढेपछि सुन प्रतितोल ५१ हजार रुपैयाँ पुगेको छ । आइतवार तोलामा पाँच सय रुपैयाँ, सोमवार तीन सय रुपैयाँ र मंगलवार दुई सय रुपैयाँ गरी तीन दिनमा सुन हजार रुपैयाँ महँगो भैसकेको छ । अघिल्लो साता सुन लगातार दुई तीनसम्म ठूलो मात्रामा घटेपछि पछिल्लो दुई वर्षको न्युनत्तमस्तर प्रतितोला ४९ हजार पाँच सयमा झरेको थियो । अन्तराष्ट्रिय बजारमा पनि सुनले विस्तारै माथिल्लो बाटो समातेको छ ।
मंगलवार सुनको मूल्य निर्धारण गर्दा नेपाली मुद्रा केही केही कमजोर भएको थियो, त्यसको असर पनि परेको छ । प्रतिडलर ८६ रुपैयाँ ५० पैसाको स्तरमा झरेको डलर अहिले बढेर फेरी ८७ रुपैयाँको स्तरमा पुगेको छ । उता कमोडिटी बजारमा चाँदीको चमक भने अझै फर्किएको छैन् । चाँदी वितेको एक सातादेखि नेपालमा स्थिर छ ।