सुन तोलामा चार सय रुपैयाँ बढेर कारोवार, मूल्य ५७ हजार, नेपाली मुद्रा पनि कमजोर बन्यो

काठमाडौं । झण्डै दुई सातादेखि स्थिर जस्तै रहेको सुनमा बुधवार तोलाको चार सय रुपैयाँले वृद्धि भएको छ । मंगलवार पनि सुन तोलामा सय रुपैयाँ बढेको थियो । नेपाल सुन चाँदी व्यवसायी संघले बुधवारका लागि छापावाल सुनको मूल्य प्रतितोला ५७ हजार रुपैयाँ तोकेको छ ।
अन्तराष्ट्रिय बजारमा सुनको मूल्य तल झरेपछि नेपालमा पनि सुनको मूल्य ५५ हजारको स्तरमा ओर्लिएको थियो । विस्तारै बढ्न थालेको सुनको मूल्यले बुधवार ५७ हजारको सीमा पार गरेको हो । बुधवार चाँदीमा पनि तोलामा पाँच रुपैयाँले मूल्य बढेर प्रतितोला १०५० कायम भएको छ ।
उता डलरको तुलनामा नेपाली मुद्रा कमजोर भएको छ । भारतीय मुद्रा कमजोर भएपछि त्यसको असर नेपाली मुद्रामा परेको हो । भारतमा बुधवार भारु १६ पैसा तल झरेर ५४.५० को स्तरमा आएको छ । नेपालमा राष्ट्र बैंकले ‘रिफ्रेन्स’ विनिमयदर प्रतिडलरको ८७ रुपैयाँ ३० पैसा तोकेको छ । मंगलवार यस्तो विनिमयदर ८७ रुपैयाँ मात्रै थियो । बुधवार मध्यान्हमा निजी वाणिज्य बैंकले राष्ट्र बैंकको रिफ्रेन्स दरभन्दा २० पैसा बढी ८७.५० सम्ममा कारोवार गरिरहेका छन् ।