आयल निगमले सबै पम्पलाई तेल बाँड्यो, उपभोक्तालाई तेल भण्डारण नगर्न निगमको अपिल

काठमाडौं । आयल निगमले बुधवार उपत्यकाका सबै पेट्रोल पम्पमा तेल दिएको छ । चालकको हड्ताल, नेपाल बन्द र त्यसपछि परेको लगातारको सार्वजनिक विदाले तेल वितरण हुननसक्दा उपत्यकामा तेल अभाव छ । निगमले बुधवार ५ लाख लिटर पेट्रोल र सात लाख लिटर डिजेल वितरण गरेको छ ।
‘हामीले माग भन्दा बढी तेल वितरण गरेका छौ । उपत्यकाका सबै पम्पले तेल दिएका छौ,’ थानकोट डिपो प्रमुख वीरेन्द्र गोइतले भने, ‘उपभोक्ता आतिनुपर्ने अवस्था छैन ।’ उनले उपभोक्तालाई तेलको भण्डारण गरेर नराख्न समेत आग्रह गरे । भारतको बरौनी तेल लिन जाँदा लुटेराले ट्ंयाकर लुटेर सहचालकलाई नशालु पदार्थ खुवाएर हत्या गरेको विरोधमा चार दिन र त्यसपछि लगातार नेपाल बन्द भएको थियो ।