दाेलखाका ६ गाविसमा भूकम्पपीडितसंग अनुदान सम्झाैता, तीनसय ७१ घरधुरीले पैसा पाउने

दोलखा । दाेलखका  छ गाविसका सम्पूर्ण भूकम्पपीडितसँग अनुदान सम्झौताको काम सकिएको छ ।

जिल्ला विकास समिति दोलखाका सूचना अधिकृत विक्रम कार्कीका अनुसार गाैरीशङ्कर, लादुक, ओराङ, बाबरे, लापिलाङ र सहरे गाविसका सम्पूर्ण पीडितसँग अनुदान सम्झौताको काम सकिएको हो । गौरीशङ्करका लाभग्राही सूचीमा नाम समावेश भएका करिब तीन सय ७१ घरधुरीमध्ये सबै घरधुरीले अनुदान सम्झौता गरेको कार्कीले बताए ।

यसैगरी लादुकमा करिब एक हजार २५ घरधुरी रहेकामा सबैले अनुदान सम्झौता भइसकेको तथा ओराङमा रहेका चार सय ८६ घरधुरी रहेकामा ती सबैले अनुदान सम्झौता गरी पहिलो किस्ताको रकम बैंक खातामा निकासा गरिएको जिविस जनाएको छ ।

यसैगरी सहरेका आठ सय ६० घरधुरी र बाबरे गाविसका एक हजार ४५ घरधुरी र लापिलाङ गाविसका एक हजार ४१३ घरधुरीमध्ये सबै घरधुरीसँग अनुदान सम्झौताको काम सकिएकाे जिविसले जनाएको छ ।

अनुदान सम्झौताको काम सुरु भएको दुई नगरपालिकासहित ४६ गाविसमध्ये छ गाविसमा मात्रै सम्पूर्ण पीडितसँग अनुदान सम्झौताको काम सकिएको हो । अन्य गाविसमा पनि अनुदान सम्झौताको काम करिब करिब अन्तिम चरणमा पुगेको तर कतिपय घरमूली जिल्ला बाहिर रहेकाको बाँकी रहेको बताइएको छ ।

एक सय आयोजना कार्यान्वयन

जिल्लामा हिमाली उपआयोजनाअन्तर्गत एक सय ४९ आयोजना सम्झौता भई कार्यान्वयन भइरहेका छन् ।

जिल्ला पशुसेवा कार्यालयका प्रमुख वरिष्ठ पशु विकास अधिकृत ज्ञानबहादुर थापाले ती आयोजनामध्ये सबैभन्दा बढी ४६ वटा बाख्रापालनसम्बन्धी उपआयोजना सञ्चालन भैरहेकाे बताए ।

हिमाली आयोजनाका वरिष्ठ कार्यक्रम अधिकृत सन्ध्या न्यौपानेले विसं २०६७ । ६८ देखि सुरु भएको उच्च पहाड कृषि व्यवसाय तथा जीविकोपार्जन सुधार आयोजना आगामी वर्ष कात्तिकसम्म सञ्चालन हुने जानकारी दिइन् ।

आयोजनाको बजेट तीन अर्ब १४ करोड २८ लाख रूपैँया छ । उपआयोजनाबाट आफ्नो जीवनस्तर उकासिनाका साथै बेरोजगारलाई समेत रोजगारी दिन सफल भएको स्थानीयले बताए ।