सुनचाँदीको महँगो मूल्यको असर देखिएन बजारमा, धनतेरसमा गहना पसल ग्राहकले भरिभराउ

काठमाडौं। सुनको मूल्य पौने तीन लाखभन्दा धेरै हुँदा पनि धनतेरसमा गहना पसलमा घुइँचो लागेको छ।

धनतेरसका दिन सुनचाँदी जोड्दा राम्रो हुने जनविश्वास रहेका कारण भाउ उच्च भए पनि गहना पसलमा ग्राहकको घुइँचो लागेको हो। सुनचाँदी पसलमा शुक्रबार अपराह्नदेखि नै ग्राहक ओइरिएका थिए। तर, घुइँचो पोहोर परार जस्तो थिएन।

व्यवसायीका अनुसार पसलमा घुइँचो लागे पनि ग्राहकले सानो सानो परिमाणमा मात्र सुन खरिद गरेका छन्।

यसपालि अघिल्ला वर्षहरुको तुलनामा ३० प्रतिशत कम व्यापार भएको व्यवसायीहरुले बताएका छन्।

‘पसलमा घुइँचो त लाग्यो तर विगतका वर्षमा जस्तो व्यापार भएन,’ एक व्यवसायीले भने, ‘भाउ महँगो भएका कारण व्यापार धेरै नहुने संकेत हामीले पहिले नै पाएका थियौं किनभने यसपालि विगतका वर्षहरुमा जस्तो अर्डर आएकै थिएन।’

कतिपय व्यवसायीले ग्राहकको घुइँचोका कारण कारोबारका बारेमा जानकारी दिने फुर्सद छैन भन्दै फोन राखे भने धेरैजसोले फोन नै उठाएनन्।

धनतेरसमा चार वर्षअघि व्यापारीहरुले ५० किलोभन्दा बढी सुन बेचेका थिए। तर, यसपालि ग्राहकबाट अर्डर नआएको कारण देखाउँदै व्यवसायीले किन्न नमान्दा बैंकले दसैंअघि नै आयात गरेको सुन समेत स्टक बसेको छ।

धनकी देवी लक्ष्मीलाई प्रसन्न पार्न धातुका भाँडा चढाउँदा १३ गुणा बढी धन लाभ हुने विश्वास गरिन्छ। यही जनविश्वासका कारण धनतेरसका दिन सुनचाँदीको धेरै कारोबार हुने गरेको छ।

नेपाल सुनचाँदी व्यवसायी महासंघले शुक्रबारका लागि सुनको मूल्य प्रति तोला २ लाख ८३ हजार र चाँदीको मूल्य ३ हजार ८१० रुपैयाँ निर्धारण गरेको थियो। सुनको भाउ शुक्रबार तोलामा ५ हजार ९०० र चाँदीको भाउ ११० रुपैयाँ घटेको थियो।

बिहीबार तोलामा सुन १३ हजार ३०० र चाँदी २६५ रुपैयाँले बढेपछि व्यवसायीहरु व्यापार विगतका वर्षमा जस्तो नहुने भयो भनेर चिन्तित भएका थिए।

धनतेरसमा उपभोक्ताले सुन र चाँदी मात्र होइन तामा र पित्तलका भाडाकुडा पनि किन्ने गरेका छन्। त्यही कारण शुक्रबार खासगरी काठमाडौंको असन क्षेत्र ग्राहकले भरिएको थियो।