भोटेकोशी बाढीपीडितका लागि बल्ल तयार भयो अस्थायी घरको नमुना, लागत ६ लाखसम्म

काठमाडौं। भोटेकोशी बाढीपीडितलाई अस्थायी बसोबासका निम्ति सरकारले बल्ल नमुना घर तयार पारेको छ।

पूर्वाधार विकासमन्त्री सुनिल लम्सालका सल्लाहकार सुमन प्रधानका अनुसार भोटेकोशी बाढीपिडितलाई अस्थायी बसोबासका निम्ति नुवाकोटको विदुरमा नमुना घर तयार गरेको जानकारी दिए।

‘हामीले बाढीपीडितलाई अस्थायी बसोबासका लागि दिने भनिएको घरको नमुना तयार भएको छ। नमुना घर बिदुर नगरपालिका-५ मा तयार पारिएको छ,’ प्रधानले भने, ‘यसमा २ वटा कोठा, एउटा किचेन र एउटा बाथरुम छ। ५ जनाको परिवारलाई पुग्नेगरी घर तयार भएको छ।‘

प्रधानका अनुसार यसको लागत ६ लाख रुपैयाँसम्म पर्ने अनुमान गरिएको छ। घर फिटिङ गर्न २ देखि ३ दिन लाग्छ।

‘हामीले पुन: प्रयोग गर्न सकिने प्रि-फ्याब मोडुलर हाउस बनाएका छौं। नमुना हाउसकै मापदण्ड अनुसार विभिन्न दातृ निकाय र विकास साझेदारले पीडितका लागि घर बनाइदिने निर्णय भएको छ,’ उनले भने, ‘अब अस्थायी घर बनाउने प्रक्रिया छिट्टै अगाडि बढ्छ।’

अस्थायी घरका लागि सिँचाइ विभागको ६ रोपनी र नेपाल विद्युत् प्राधिकरणको ५६ रोपनी जग्गा उपयोग गरिनेछ। यसबाहेक स्थानीय तहको सिफारिसमा पनि अस्थायी आवास बन्नेछन्। प्रधानका अनुसार विभिन्न राष्ट्रिय तथा अन्तर्राष्ट्रिय गैरसरकारी संस्थासँग सम्झौता गरेर डेढदेखि २ महिनाभित्र अस्थायी घर बनाइनेछ।

बाढीपीडितका लागि ७ हजार ६२४ वटा अस्थायी आवास बनाउन राष्ट्रिय तथा अन्तर्राष्ट्रिय गैरसरकारी संस्था अघिसरिसकेका छन्।