प्रधानमन्त्री बालेनले करिब तीन सातापछि बोलाए मन्त्रिपरिषद् बैठक, आज अपराह्न बस्ने

काठमाडौं। प्रधानमन्त्री बालेन्द्र शाहले मन्त्रिपरिषद् बैठक बोलाएका छन्।

बालेनले करिब तीन सातापछि मन्त्रिपरिषद्‍को बैठक बोलाएका हुन्। बैठक मंगलबार अपराह्न ३ बजेका लागि तय गरिएको सरकारका प्रवक्ता सस्मित पोखरेलको सचिवालयले जनाएको छ।

यसअघि मन्त्रिपरिषद् बैठक असोज ३० गते शुक्रबार बसेको थियो। त्यसपछि दसैं बिदा परेकामा सरकारी कार्यालय कात्तिक ९ गते खुलेका थिए।

तर, प्रधानमन्त्री बालेनले अघिल्लो साता मन्त्रिपरिषद् बैठक राखेका थिएनन्। बैठक नराखिएपछि कतिपयले प्रधानमन्त्री बालेन र सत्तारुढ राष्ट्रिय स्वतन्त्र पार्टीका सभापति रवि लामिछानेबीच चिसोपना बढेको रुपमा अर्थ्याएका थिए। बालेनले अघिल्लो साता रविलाई उनकै निवासमा पुगेर करिब तीन घण्टा कुरा गरेका थिए।