सेबोनले निकाल्यो आइपीओ अनुमति माग्ने कम्पनीको चरणवद्ध सूची, कुनको प्रक्रिया कहाँ पुग्यो?

काठमाडौं। नेपाल धितोपत्र बोर्ड(सेबोन)ले आइपीओ अनुमतिका लागि आवेदन दिएका कम्पनीको चरणबद्ध सूची निकालेको छ।

आइपीओ अनुमतिका लागि कम्पनीले पेस गरेका कागजात, विवरण र तोकिएका मापदण्डका आधारमा सेबोनले अनुमतिको प्रक्रियालाई विभिन्न चरणमा राखेको हो।

कान्तिपुर फर्मास्युटिकल्स ल्याब र आशुतोष इनर्जी आइपीओ अनुमतिको अन्तिम चरणमा रहेको सेबोनले जनाएको छ।

कम्पनीले पेस गरेको जवाफ समीक्षाको क्रम तथा पाँचौं चरणमा १० कम्पनी छन्। अन्तिम चरणमा रहेका दुई कम्पनीले अनुमति पाएपछि जवाफ पेस गरेका कम्पनीको अनुमति सुरु हुनेछ।

यस्तै, पहिलो चरणमा आवेदन दिएका ७६ कम्पनीको सूची छ। दोस्रो चरणमा प्रारम्भिक समीक्षाका क्रममा रहेका ६ कम्पनी छन्। तेस्रो चरणमा रहेका ४ कम्पनीलाई सेबोनले प्रतिक्रिया/टिप्पणी पठाइएको जनाएको छ।

चौथो चरणमा १९ कम्पनी छन्। ती कम्पनीले सेबोनलाई जवाफ/प्रतिक्रिया पठाएका छन्। आइपीओ अनुमतिका लागि सेबोनको पाइपलाइनमा ११३ कम्पनी छन्।

ती कम्पनीले ७१ अर्ब ४२ करोड रुपैयाँ बराबरको ५१ करोड ९ लाख कित्ता सेयर अंकित मूल्य र प्रिमियममा बिक्री गर्न आवेदन दिएका छन्।

सेबोनले कम्पनीलाई आइपीओ अनुमति दिन मर्चेन्ट बैंकरमार्फत स्क्रिनिङ गरिरहेको छ। मर्चेन्ट बैंकरलाई मापदण्डसहित निर्देशन जारी गरिएको छ।

चरण १ : आवेदन दिएका ७६ कम्पनी

चरण २: प्रारम्भिक समीक्षाका क्रममा ६ कम्पनी

चरण ३ : प्रतिक्रिया/टिप्पणी पठाइएका ४ कम्पनी

चरण ४ : जवाफ/प्रतिक्रिया प्राप्त १९ कम्पनी

चरण ५ : प्राप्त जवाफ समीक्षाका क्रममा १० कम्पनी

चरण ६ : अन्तिम समीक्षाका क्रममा २ कम्पनी