भोटेकोशी बाढीको डेढ महिनापछि बेत्रावतीमा जोडियो ‘एक्रो ब्रिज’, स्याफ्रुबेंसीसम्म खुल्यो सडक

बेत्रावती। गत भदौ १० गतेको भोटेकोशी र त्रिशूली बाढीले बेत्रावतीस्थित फलाकु खोलाको पक्की पुल बगाएपछि राष्ट्रिय सडक सञ्जालबाट बाहिरिएको रसुवा जिल्ला नेपाली सेनाले ‘एक्रो ब्रिज’ जडान गरेसँगै पुनःसडक सञ्जालमा जोडिएको छ।

बेत्रावतीमा पुल सञ्चालनमा आएसँगै रसुवा-नुवाकोट आवतजावत गर्ने सवारी साधनले अप्ठ्यारा र लामा वैकल्पिक सडक प्रयोग गर्नुपर्ने बाध्यता हटेको छ। सेनाले निर्माण गरेको सो पुल आज एक कार्यक्रमबीच गल्छी–रसुवागढी सडक आयोजनालाई हस्तान्तरण गरिएको हो।

 रसुवाको उत्तरगया नगरपालिका–५ र नुवाकोटको विदुर नगरपालिका–१० जोड्ने फलाकु खोलामा निर्मित नयाँ र पुराना पुल बाढीले बगाएपछि रसुवासँगको सडक सम्पर्क बिच्छेद भएको थियो।

बाढीले अधिकांश सडक बगाएपछि सडक विभागसँगको समन्वयमा सेनाले करिब ३०० मिटरको कठिन चट्टान हटाई पहुँच मार्ग विस्तार गरी बेत्रावतीसम्म सडक खुलाएको थियो।

सैनिक प्रवक्ता एवं सहायक रथी राजाराम बस्नेतले यही असोज २० गतेदेखि सो क्षेत्रमा एक्रो ब्रिज जडान सुरु गरी पाँचौँ दिनमा गल्छी–त्रिशूली–मैलुङ–स्याफ्रुबेँसी–रसुवागढी सडक आयोजनालाई हस्तान्तरण गरिएको जानकारी दिए।

करिब २४० फिट लम्बाइ र १८ फिट चौडाइको सो पुलको भारवहन क्षमता ६० टन छ। पुलको सुरक्षाका लागि भारवहन क्षमता ४० टन तोकिएको छ। सेनाले हालसम्म देशका विभिन्न भागमा ५१ वटा ‘एक्रो ब्रिज’ र ‘बेली ब्रिज’ जडान गरिसकेको प्रवक्ता बस्नेतले जानकारी दिए। ती पुलको लम्बाइ दुई हजार १७७ मिटर छ।

नेपाली सेनाका युद्धकार्य विभागका प्रमुख एवं उपरथी अनुपजङ्ग थापाले गल्छी–त्रिशूली–मैलुङ–स्याफ्रुबेँसी–रसुवागढी सडक योजनाका प्रमुख कृष्णनाथ ओझालाई उक्त पुल हस्तान्तरण गरे। हस्तान्तरण कार्यक्रममा रसुवाको उत्तरगया गाउँपालिका र नुवाकोटको विदुर नगरपालिकाका अध्यक्ष तथा प्रमुख एवं रसुवा र नुवाकोट जिल्लाका प्रमुख जिल्ला अधिकारी, सुरक्षा निकायका प्रमुख तथा प्रतिनिधि सहभागी थिए।

“एक्रो ब्रिज सञ्चालनमा आएसँगै नुवाकोट तथा रसुवा आसपासका क्षेत्रका नागरिकलाई आवतजावत गर्न र बाढीबाट प्रभावित क्षेत्रमा आवश्यक राहत तथा अत्यावश्यक सामग्रीको ढुवानीमा सहजता हुने विश्वास लिइएको छ”, सैनिक प्रवक्ता बस्नेतले भने।

उक्त पुल निर्माणको नेतृत्व गर्नुभएका प्रमुख सेनानी करुणबहादुर थापाले ८० जना फौजको टोलीले चार दिनमा पुल जडान गर्न सफल भएको जानकारी दिए।

“यही असोज २० गतेदेखि सुरु गरेर २४ गते साँझसम्म निर्माण सम्पन्न गरी आज हस्तान्तरण गरेका हौँ”, उनले भने।

पुल निर्माणसँगै धादिङको गल्छी, नुवाकोटको देवीघाट, त्रिशूली र बेत्रावती तथा रसुवाको धुन्चे हुँदै स्याफ्रुबेँसीसम्म सडक सञ्चालनमा आएको छ। स्याप्रुबेँसीबाट रसुवागढी नाकासम्म करिब १७ किलोमिटर सडक पुनःनिर्माण गर्नुपर्ने चुनौती छ।

पुल सञ्चालनमा आएसँगै रसुवाका विभिन्न क्षेत्रमा रोकिएका ट्रक तथा कन्टेनर धमाधम नुवाकोटतर्फ फर्केका छन्। यसअघि सेनाले गत भदौमा नुवाकोटको विदुर नगरपालिका र बेलकोटगढी नगरपालिका जोड्ने देवीघाटस्थित तादी खोलामा एक्रो ब्रिज निर्माण गरेको थियो।

उत्तरगया गाउँपालिकाका अध्यक्ष माधवप्रसाद अर्यालले बेत्रावतीमा पुल निर्माण भएसँगै दैनिक उपभोग्य वस्तुको आपूर्ति र पुनर्निर्माणको अभियानमा राहत मिल्ने बताए।

 “अहिले पनि हामी महाविपत्तिको सामना गरिरहेका छौँ, पीडित तथा प्रभावित परिवार स्तब्ध हुनुहुन्छ, उहाँहरूलाई फेरि पुनर्जीवनमा फर्काउनसक्ने स्थिति त बनेकै छैन”, उनले भने, “तर, पनि सुविधाको हिसाबले यो पुल बन्दा जनजीवनलाई सामान्यतर्फ फर्काउन सजिलो भएको छ।”

पुल नहुँदा रसुवाका विभिन्न भागमा खाद्यान्नलगायत दैनिक उपभोग्य वस्तुको अभाव हुन थालिसकेको थियो। वैकल्पिक मार्गबाट आपूर्ति सहज बनिरहेको थिएन।

“हामीसँग वैकल्पिक मार्ग त थियो तर, ती मार्गमा पहुँच स्थानीय जनताको सहज पुहँच थिएन, बजारसँग जोड्न सकिरहेको अवस्था पनि थिएन”, अध्यक्ष अर्यालले भने, “नेपाली सेनाको तदारुकतासाथ यो पुल बनेको छ, यसले रसुवालाई राष्ट्रिय राजमार्गसँग जोडेको छ। अब जनजीवनलाई सामान्यीकरण गर्न सजिलो हुनेछ।”

नुवाकोटको किस्पाङ गाउँपालिका वडा नं ५ का स्थानीय पार्वती भट्ट बाढीले बेत्रावतीका पुल बगाउँदा उकुसमुकुसको अवस्था रहेको बताइन।

“बिरामी पर्दा अस्पतालसम्म जानै पनि अप्ठ्यारो थियो, बाढीपछि उम्केर अहिले बेत्रावती आइपुगेको हुँ, खोलो तरेर यताउता देखेको आजै हो”, उनले भनिन, “पुल नहुँदा हामी त अनकन्टारमा थियौँ, अब पुल बन्यो, सडक खुल्दैछ, बत्ती, इन्टरनेट आएको छ, बिस्तारै ‘उज्यालो’ फर्कंदैछ।” रासस