गलौदीमा त्रिशूलीको कटानले पृथ्वी राजमार्ग अवरुद्ध, राति नौ बजेदेखि एकतर्फी खुल्ने

काठमाडौं। धादिङको गजुरी नजिकै गलौदी क्षेत्रमा त्रिशूली नदीको कटानले सडक भासिएपछि पृथ्वी राजमार्ग पूर्ण रूपमा अवरुद्ध भएको छ।

सडक विभागका अनुसार आज राति ९ बजेदेखि एकतर्फी सवारी आवागमन सञ्चालन गर्ने लक्ष्य राखिएको छ।

अवरुद्ध सडक खुलाउन सडक विभागले भित्तापट्टिको भाग काटेर सडक विस्तार गर्ने काम तीव्र बनाएको छ। विभागले उपलब्ध जनशक्ति, उपकरण र स्रोतसाधन परिचालन गरी सडक सुरक्षित रूपमा सञ्चालनमा ल्याउने प्रयास गरिरहेको जनाएको छ।

विभागको कार्ययोजनाअनुसार भोलि बिहान ७ बजेदेखि दुईतर्फी सवारी सञ्चालनका लागि आवश्यक सडक विस्तारको काम सुरु गरिनेछ। मौसम र अन्य परिस्थिति अनुकूल रहेमा भोलि साँझ ६ बजेसम्म सडक विस्तार सम्पन्न गरी दुईतर्फी आवागमन खुलाइनेछ।