वेत्रावतीपछि स्याफ्रुबेसीमा बेलिब्रिज जडानको काम अघि बढ्यो, फाउन्डेशन उठाउने क्रम सुरु

काठमाडौं।  रसुवाको स्याफ्रुबेसीमा बेलिब्रिज जडान गर्न फाउन्डेसन निर्माणको काम अघि बढाइएको छ। नदीका दुवैतर्फ उपकरण परिचालन गरी सडकको अस्थायी ट्रयाक खोल्ने काम सुरु गरिएको हो।

७६ मिटर लम्बाईको बेलिब्रिज निर्माण गर्न एक्सिस रोड निर्माणको काम भइरहेको पूर्वाधार विकास मन्त्रालयले जनाएको छ।

बेलिब्रिज जडान गर्न १४ मिटर फाउन्डेशन उठाउन जग खन्न दुई वटा स्काईभेटर प्रयोग भइरहेको छ। वेत्रावतीमा बेलिब्रिज जडानको काम अन्तिम चरणमा पुगेसँगै स्याफ्रुबेसीमा पनि निर्माण कार्यलाई तीव्रता दिइएको हो।

स्याफ्रुबेसीमा बेलिब्रिज निर्माण सम्पन्न भएसँगै रसुवागढीसम्मको सडक सञ्जाल पुनःस्थापित हुनेछ।