म्याक्लमोर विवादपछि आँधीले पनि रोक्यो शिरानको लुप टुर, दर्शकलाई टिकट रकम फिर्ता

फक्सबरो, म्यासाचुसेट्स। अमेरिकी पूर्वी तटतर्फ अघि बढिरहेको शक्तिशाली ‘नोरइस्टर’ आँधीका कारण बेलायती पपगायक एड शिरानका म्यासाचुसेट्समा शुक्रबार र शनिबार तय भएका कन्सर्ट रद्द भएका छन्। आयोजकले दर्शकलाई टिकटको रकम फिर्ता गर्ने जनाएको छ।

बोस्टनबाट करिब ३७ किलोमिटर दक्षिणपश्चिममा रहेको फक्सबरोस्थित जिलेट स्टेडियममा हुने दुवै कन्सर्ट खराब मौसमका कारण रद्द गरिएको हो। कन्सर्ट प्रवर्द्धक मेसिना टुरिङले स्थानीय अधिकारीसँगको परामर्शपछि दर्शक, कर्मचारी र कार्यक्रममा संलग्न सबैको सुरक्षालाई प्राथमिकतामा राख्दै कन्सर्ट रद्द गर्ने कठिन निर्णय गरिएको जनाएको छ।

नोरइस्टरका कारण न्यु इङ्ल्यान्डसहित अमेरिकाको पूर्वी तटीय क्षेत्रमा शुक्रबारदेखि तीव्र हावा, समुद्री क्षेत्रमा बाढी र भारी वर्षाको जोखिम रहेको मौसम अधिकारीहरूले बताएका छन्। केप कोड, मार्थाज भिनयार्ड र नान्टकेट क्षेत्रमा शुक्रबार राति हावाको गति प्रतिघण्टा ९७ देखि १०५ किलोमिटरसम्म पुग्न सक्ने तथा बोस्टन आसपास प्रतिघण्टा ८० देखि ८९ किलोमिटरसम्म हावा चल्ने अनुमान गरिएको छ।

आँधीका कारण न्युयोर्कमा यो सप्ताहन्त आयोजना हुने ‘ग्लोबल सिटिजन’, ‘सीबीजीबी’ र ‘अल थिङ्स गो’ महोत्सवका कार्यक्रम पनि रद्द भएका छन्। ग्लोबल सिटिजनमा यस वर्ष मिस लरेन हिल र वाइक्लिफ जाँको प्रस्तुति तय थियो। अल थिङ्स गोमा जारा लार्सन, लोला यङ, ब्रान्डी कार्लाइल र कार्ली रे जेप्सनलगायत कलाकार सहभागी हुने तय थियो भने सीबीजीबीका मुख्य कलाकारमा मोरिसी र प्याटी स्मिथ थिए।

शिरानको ‘लुप टुर’ का लागि पछिल्लो दुई साता पनि उतारचढावपूर्ण रहँदै आएको छ। सेप्टेम्बर ५ मा न्यु जर्सीमा भएको कन्सर्टमा प्यालेस्टाइनको समर्थनमा टिप्पणी गरेपछि र्‍यापर म्याक्लमोरलाई टुरबाट हटाइएको थियो। त्यसको विरोधमा केही सहयोगी कलाकारले पनि टुरबाट अलग हुने घोषणा गरेका थिए।

त्यसपछि फिलाडेल्फियामा भएको कन्सर्टमा शिरानले आफ्नो संगीत र कार्यक्रमलाई राजनीतिभन्दा एकता र मानवतासँग जोड्न चाहेको बताएका थिए। यद्यपि, उनले सन् २०२३ अक्टोबर ७ मा इजरायलमा भएको हमलालाई भयावह भन्दै गाजामा भइरहेको अवस्थालाई ‘विनाशकारी र अनुचित’ बताएका थिए।

म्याक्लमोरलाई टुरबाट हटाउने निर्णय जिलेट स्टेडियमका मालिक तथा एनएफएल टोली न्यु इङ्ल्यान्ड प्याट्रियट्सका मालिक रोबर्ट क्राफ्टको आग्रहमा भएको थियो। क्राफ्टले म्याक्लमोरका पछिल्ला अभिव्यक्ति र विगतका ‘यहुदीविरोधी’ भनिएका अभिव्यक्ति तथा प्रतीकात्मक प्रस्तुतिलाई निर्णयको कारण बताएका थिए। शिरानले भने म्याक्लमोरलाई हटाउने निर्णयमा आफ्नो भूमिका नरहेको र यसको जिम्मेवारी टुर प्रवर्द्धकमाथि रहेको बताएका छन्।

म्याक्लमोरले गत साता प्यालेस्टिनी राहतका लागि १० लाख डलर सहयोग गर्ने घोषणा गर्दै क्राफ्टलाई पनि सोही रकम सहयोग गर्न आग्रह गरेका थिए। क्राफ्ट र शिरान दुवैले २० लाख डलर सहयोग गर्ने सहमति जनाएको उनीहरूका प्रतिनिधिले बताएका छन्, तर उक्त रकम कहाँ खर्च गरिने स्पष्ट गरिएको छैन।

उद्योग पत्रिका पोलस्टारका अनुसार ग्रामी अवार्ड विजेता शिरान गत वर्षसम्म सहस्राब्दी अवधिमा सबैभन्दा बढी आम्दानी गर्ने कन्सर्ट कलाकारमध्ये तेस्रो स्थानमा थिए। (एपी)