सानेपामा विश्वकर्मा बाबाका मूर्ति बनाउन कलाकारहरू व्यस्त (तस्बिरहरू)

ललितपुर। सानेपामा विश्वकर्मा बाबाका मूर्ति बनाउन यतिबेला कलाकारहरू व्यस्त छन्। भोलिको विश्वकर्मा पूजाका लागि मूर्ति बनाउने र रंगरोगन गर्ने काम तीव्र भएको छ।

सानेपाका विभिन्न स्थानमा कलाकारहरूले विश्वकर्मा बाबाका मूर्ति तयार गरिरहेका छन्। साना, मझौला र ठूला आकारका मूर्ति बनाइँदै छन्।

आकारअनुसार एउटा मूर्तिको मूल्य १ हजार ५ सय रुपैयाँदेखि ५ हजार रुपैयाँसम्म पर्ने गरेको छ।

विश्वकर्मा पूजाका दिन विशेषगरी औजार, सवारीसाधन तथा विभिन्न उपकरणको पूजा गर्ने परम्परा छ। उद्योग, कारखाना, वर्कसप र ग्यारेजमा विश्वकर्माको विशेष पूजा गरिन्छ।

वैदिक तथा हिन्दू परम्परामा विश्वकर्मालाई देवताहरूका शिल्प विशेषज्ञका रूपमा मानिन्छ। उनी देवताका भवन निर्माण गर्ने, हतियार बनाउने तथा विभिन्न यान र संरचनाका रचयिता मानिन्छन्।