एसीसी प्रिमियर कप : बाबर हायतको शतकीय इनिङ्सले नेपालसामू हङकङको चुनौतीपूर्ण लक्ष्य

काठमाडौं। हङकङले नेपालसामू २६२ रनको लक्ष्य प्रस्तुत गरेको छ। एसीसी प्रिमियर कपको समूह चरणको आफ्नो अन्तिम खेलमा उत्रिएको नेपालले हङकङबाट चुनौतीपूर्ण लक्ष्य पाएको हो।

मलेसियाको क्वललाम्पुरस्थित वायुमास ओभलमा जारी खेलमा टस जितेर ब्याटिङमा उत्रिएको हङकङले निर्धारित ५० ओभरमा २६१ रन बनायो। उसका लागि बाबर हायतले सर्वाधिक अविजित ११७ रन बनाउँदा शाहिद वासिफले ४५ तथा एहसान खानले अविजित ३५ रन बनाए।

बलिङमा नेपालका सन्दीप लामिछानेले ४ तथा शेर मल्लले ३ विकेट लिए पनि हङकङलाई रोक्न सकेनन्। ३०.५ ओभरमा १३३-७ को अफ्ठेरो स्थितिमा पुगिसकेको हङकङले सानदार मोमेन्टम बनाउँदै ५० ओभरमा २६१-७ सम्म पुगेको हो।

लगातार तीन जित निकालेको नेपाल यसअघि नै प्रतियोगिताको सेमिफाइनल पुगिसकेको छ। सेमिफाइनलको होडमा दुई समूहमा १० टोली प्रतिस्पर्धामा छन्। जसमध्ये ४ टोलीले सेमिफाइनल खेल्दा ६ टोली बाहिरिनेछन्।

नेपाल जवाफी ब्याटिङमा उत्रिँदैछ।