बाढी प्रभावित रसुवामा हैजाको जोखिम, डब्लूएचओको सहयोगमा पठाइयो २१ हजार डोज खोप

काठमाडौं। बाढीग्रस्त रसुवामा हैजाको जोखिम बढेपछि हैजाविरुद्धको २१ हजार डोज खोप पठाइएको छ।

विश्व स्वास्थ्य संगठन (डब्लूएचओ)को सहयोगमा प्राप्त खोप नेपाली सेनाको हेलिकोप्टरमार्फत आइतबार बिहान रसुवा पठाइएको हो।

रसुवाका टिमुरे, स्याफ्रुबेसी र बेत्रावतीका वस्ती भदौ १० गतेको बाढीले क्षतविक्षत भएकामा करिब ५ हजार मानिस अझै बेपत्ता छन्।

स्वास्थ्यमन्त्री निशा मेहताले बाढी प्रभावित क्षेत्रमा हैजा तथा पानीजन्य अन्य रोगको जोखिम न्यूनीकरणका लागि औषधि, खोप, स्वास्थ्य सामग्री र आवश्यक जनस्वास्थ्य सेवा तत्काल उपलब्ध गराउन निर्देशन दिएकी छन्।

मन्त्रीको निर्देशनमा प्रभावित क्षेत्रमा खोप तथा औषधि पठाउने, रोग निगरानी बढाउने, सुरक्षित खानेपानी र सरसफाइमा विशेष ध्यान दिने तथा आवश्यक स्वास्थ्यकर्मी परिचालन गर्ने काम अघि बढाइएको उनको सचिवालयले जनाएको छ।