अस्ट्रेलियामाथि बंगलादेशको ऐतिहासिक जित, भारतलाई पछि पार्दै चौथो स्थानमा उक्लियो

काठमाडौं। बंगलादेशले अस्ट्रेलियामाथि ऐतिहासिक जित निकालेको छ। बंगलादेशले विश्व टेस्ट च्याम्पियनसिप (डब्ल्यूटीसी) मा उत्कृष्ट प्रदर्शनलाई निरन्तरता दिँदै शीर्ष स्थानको अस्ट्रेलियामाथि ९ विकेटको शानदार जित निकालेको हो।

डार्विनमा भएको टेस्टमा अस्ट्रेलियालाई पराजित गर्दै बंगलादेशले डब्ल्यूटीसी अंक तालिकामा पनि महत्त्वपूर्ण फड्को मारेको छ। भारतलाई पछि पार्दै बंगलादेश चौथो स्थानमा उक्लिएको छ।

टस जितेर पहिले ब्याटिङ गरेको अस्ट्रेलियाले बंगलादेशको तीव्र गतिको बलिङसामु ठूलो स्कोर बनाउन सकेन। हसन महमुदले अस्ट्रेलियाका दुवै ओपनरलाई सस्तैमा आउट गर्दै बंगलादेशलाई उत्कृष्ट सुरुवात दिलाए।

त्यसपछि पनि बंगलादेशका बलरले नियमित अन्तरालमा विकेट लिए। स्टिभ स्मिथले केही प्रतिरोध गरे पनि अस्ट्रेलिया पहिलो इनिङ्समा १९८ रनमै अलआउट भयो।

बंगलादेशका लागि प्लेयर अफ द म्याच हसन महमुदले ५५ रन खर्चेर ६ विकेट लिए। उनको घातक बलिङले बंगलादेशलाई खेलमा बलियो अवस्थामा पुर्‍यायो।

जवाफी ब्याटिङमा बंगलादेशले उत्कृष्ट प्रदर्शन गर्‍यो। ओपनर तान्जिद हसनले १९७ बलमा १०१ रनको शानदार शतकीय इनिङ्स खेले।

कप्तान नजमुल हुसेन शान्तोले १२६ बलमा ८४ रन बनाए। मेहिदी हसन मिराजले पनि १५४ बलमा ६५ रनको महत्त्वपूर्ण योगदान दिए।

बंगलादेशले पहिलो इनिङ्समा ४२६ रन बनायो। अस्ट्रेलियाका जोस हेजलउडले ६ विकेट लिए पनि बंगलादेशले २२८ रनको महत्त्वपूर्ण अग्रता हासिल गर्‍यो।

दोस्रो इनिङ्समा पनि हसन महमुदले अस्ट्रेलियाका ओपनरलाई सस्तैमा आउट गर्दै बंगलादेशलाई उत्कृष्ट सुरुवात दिलाए। त्यसपछि स्पिनर मेहिदी हसन मिराजले बलिङको जिम्मेवारी सम्हाले। उनले ५ विकेट लिएपछि अस्ट्रेलियामाथि दबाब झनै बढ्यो।

अस्ट्रेलियाका लागि क्यामरन ग्रीनले २०१ बलमा १०४ रनको शतकीय इनिङ्स खेल्दै एक्लो संघर्ष गरे। तर, बंगलादेशका बलरले अन्य ब्याटरलाई लामो समय क्रिजमा टिक्न दिएनन्। अस्ट्रेलिया दोस्रो इनिङ्समा २८४ रनमा समेटियो।

बंगलादेशले जितका लागि ५७ रनको सामान्य लक्ष्य पाएको थियो। उसले एक विकेट गुमाएर लक्ष्य पूरा गर्दै ९ विकेटको ऐतिहासिक जित दर्ता गर्‍यो।

यो जित बंगलादेशका लागि अझ विशेष रह्यो। अस्ट्रेलिया भ्रमणअघि उसले क्रिकेट अस्ट्रेलिया-११ विरुद्धको अभ्यास खेलमा ५४ रनमा अलआउट भएको थियो। त्यसपछि अस्ट्रेलियाकै भूमिमा टेस्टमा गरेको उत्कृष्ट प्रदर्शनले बंगलादेशको टोलीमा आएको सुधारलाई देखाएको छ।

ऐतिहासिक जितपछि कप्तान नजमुल हुसेन शान्तोले टोलीको मेहनतको प्रशंसा गरे। उनले यो जितलाई सबै फर्म्याटमा बंगलादेशको अहिलेसम्मकै सबैभन्दा ठूलो जित भएको बताए।

‘म आफू र टोलीका खेलाडीले गरेको प्रदर्शनबाट निकै खुसी र गर्वित छु। हामीले धेरै मेहनत गरेका थियौँ,’ शान्तोले खेलपछि भने।

उनका अनुसार केही वर्षअघि बंगलादेशका तीव्र गतिका बलरहरू टेस्ट क्रिकेट खेल्न त्यति इच्छुक थिएनन्। तर, पछिल्लो समय टोलीले लगातार टेस्ट क्रिकेट खेल्न थालेपछि खेलाडीमा टेस्टप्रतिको महत्त्व बढेको छ।