विराटनगर जुटमिल पुनः सञ्चालन गर्ने सरकारको तयारी, विकल्प सिफारिस गर्न कार्यदल गठन

काठमाडौं। सरकारले विराटनगर जुटमिल पुनः सञ्चालन गर्ने तयारीस्वरुप एक कार्यदल गठन गरेको छ।

उद्योगको विद्यमान आर्थिक, प्राविधिक तथा कानुनी अवस्था अध्ययन गरी पुनः सञ्चालनका लागि उपयुक्त विकल्प सिफारिस गर्न कार्यदल गठन गरिएको हो।

प्रधानमन्त्री तथा मन्त्रिपरिषद्को कार्यालयका सचिव वीरेन्द्रकुमार यादवले विराटनगर जुटमिलको वर्तमान अवस्था, यसअघि भएका निर्णय तथा विभिन्न निकायबाट तयार गरिएका अध्ययन प्रतिवेदनको समीक्षा गर्दै पुनः सञ्चालनका लागि आवश्यक रणनीति तय गर्ने उद्देश्यले कार्यदल गठन गरेको बताए।

कार्यदलमा उद्योग, वाणिज्य तथा आपूर्ति मन्त्रालयका संस्थान हेर्ने सहसचिव तथा प्रधानमन्त्री तथा मन्त्रिपरिषद्को कार्यालय, अर्थ मन्त्रालय र कानुन मन्त्रालयका उपसचिव छन्।

कार्यदललाई प्रतिवेदन पेस गर्न एक महिनाको समय दिइएको छ।