प्रतिनिधिसभामा खानी र खनिज विधेयक पेस हुँदै, सार्वजनिक लेखा र आर्थिक मामिलाको बैठक आज

काठमाडौं । आज प्रतिनिधिसभाको बैठक बस्दैछ। दिउँसो १ बजे बस्ने बैठकमा खानी तथा खनिज पदार्थ विधेयक, २०८३ माथि विचार गरियोस् भन्ने प्रस्ताव पेस गर्ने कार्यसूची छ।

उद्योग, वाणिज्य तथा आपूर्तिमन्त्री गौरी कुमारीले उक्त प्रस्ताव प्रस्तुत गर्ने सम्भावित कार्यसूची छ।

यस्तै, आजै दुई वटा संसदीय समितिको बैठक बस्दैछ। संघीय संसद् सचिवालयका अनुसार सार्वजनिक लेखा समिति र विकास आर्थिक मामिला तथा सुशासन समितिको बैठक बस्ने कार्यसूची छ।

बिहान ११ बजे बस्ने सार्वजनिक लेखा समितिको बैठकमा ‘२०८२ भदौ २३ र २४ गते भएको आन्दोलन र घटनाका कारण जलेका स्रेस्ता सम्बन्धमा’ छलफल गर्ने कार्यक्रम छ।

विकास आर्थिक मामिला तथा सुशासन समितिको बैठक पनि बिहान ११ बजे बस्दैछ। सो समितिको बैठकमा ‘डिजिटल अर्थतन्त्रको सम्बन्धमा छलफल’ गर्ने कार्यसूची छ।