एनएसीले चाडपर्वलाई लक्षित गरी जापानमा उडान थप्ने, वाइडबडी जहाज एक महिनापछि फर्कियो

काठमाडौं। नेपाल वायुसेवा निगम (एनएसी)ले जापानमा उडान थप्ने भएको छ। एनएसीले चाडपर्वलाई लक्षित गर्दै आगामी असोज २ गतेदेखि जापानमा साताको चार वटा नियमित उडान गर्ने भएको हो।

काठमाडौं-नारिता-काठमाडौं उडान मंगलबार, बिहीबार, शुक्रबार र आइतबार सञ्चालन गर्ने तालिका बनाएकव एनएसीले जनाएको छ। एनएसीले जापानमा हाल सातामा तीनवटा उडान गर्दै आएको छ।

एनएसीको ९एन एएलवाई कलसाइनको वाइडबडी जहाज नियमित मर्मत सम्भार (सी-चेक) सम्पन्न गरी एक महिनापछि बिहीबार स्वदेश फर्किएको छ। जहाज चौथो सी-चेकका लागि गत असार २३ गते इटली पठाइएको थियो।

जहाजले नियमित उडान थालेको छ। एनएसीले पोखरा अन्तर्राष्ट्रिय विमानस्थलमा फ्लाई दुबईको नियमित उडानका लागि ग्राउण्डह्याण्डलिङ सेवाको तयारी पूरा गरेको बताएको छ।