स्पाइडरम्यान – ब्राण्ड न्यु डे : सुपरहिरो फर्किए अघिल्ला सिरिजभन्दा फरक र परिपक्व कथामा

मार्भल सिनेमेटिक युनिभर्स र सोनी पिक्चर्सको सहकार्यमा निर्मित बहुप्रतीक्षित सुपरहिरो चलचित्र ‘स्पाइडरम्यान : ब्राण्ड न्यु डे’ ले अहिले संसारभरका सिनेपारखीहरूको ध्यानाकर्षण गरिरहेको छ। हलमा प्रदर्शनमा आउनासाथ यस चलचित्रले बक्स अफिसमा आक्रामक ओपनिङ दर्ता गर्दै प्रि-सेलका धेरै रेकर्डहरू तोडेको छ।

इन्डिया टाइम्सका अनुसार भारतमा मात्र पहिलो दिन भारु ७२ करोडभन्दा बढी ग्रस कमाउँदै यसले ‘एभेन्जर्स : इन्ड गेम’ को रेकर्ड तोडेर सबैभन्दा ठूलो हलिउड ओपनिङ दर्ता गरेको छ। नेपालमा पनि यो फिल्मले दर्शकको साथ पाएको छ।

विश्वभरबाट पहिलो सातामै अर्बौंको व्यापार गर्दै यो फिल्म वर्षकै सर्वाधिक कमाउने व्यावसायिक ब्लकबस्टर बन्ने दिशामा छ।

समीक्षकहरूले यसलाई एमसियुकै अहिलेसम्मकै सबैभन्दा परिपक्व र भावनात्मक ‘स्पाइडरम्यान’ फिल्मको संज्ञा दिएका छन्। विगतका सिरिजहरूमा स्पाइडरम्यानलाई उच्च प्रविधियुक्त ग्याजेट, एभेन्जर्सका टोली र अभिभावकत्वमा आधारित हल्का-फुल्का कथामा प्रस्तुत गरिन्थ्यो भने ‘ब्राण्ड न्यु डे’ मा आइपुग्दा यो शैली पूर्ण रूपमा फेरिएको छ।

फिल्मले ठूला-ठूला ब्रह्माण्ड बचाउने दृश्यभन्दा पनि एउटा व्यक्तिको आन्तरिक मनोविज्ञान, एकाकीपन र आत्म-खोजलाई गहिरो गरी केलाएको छ।

‘नो वे होम’ को अभूतपूर्व सफलतापछि अभिनेता टम हल्याण्ड यसपटक पुनः पिटर पार्करको भूमिकामा पर्दामा फर्किएका छन्। डाक्टर स्ट्रेन्जको मन्त्रपछि सम्पूर्ण संसारले पिटर पार्करको वास्तविक पहिचान बिर्सिसकेको बिन्दुबाट यस फिल्मको कथा अगाडि बढ्छ।

आफ्ना प्रिय साथीहरू एमजे र नेडबाट अलग्गिएर न्यूयोर्क सहरमा बिल्कुलै एकाकी र सामान्य जीवन बिताइरहेका पिटर यस पटक कुनै मल्टिभर्स वा अन्तरिक्षीय संकटसँग भन्दा पनि शहरका सडक-स्तरीय अपराध र आफ्नो व्यक्तिगत एकाकीपनसँग जुधिरहेका छन्। एकातिर आफ्ना प्रियजनले आफूलाई नचिन्दाको मानसिक पीडा र अर्कोतिर न्यूयोर्कमा उत्पन्न भएको नयाँ रहस्यमयी खतराका बीच पिटरले कसरी आफ्नो जिम्मेवारी निभाउँछन् भन्ने नै फिल्मको मुख्य सार हो।

‘शाङ-ची एण्ड द लेजेण्ड अफ द टेन्स रिङ्स’ का चर्चित निर्देशक डेस्टिन डेनियल क्रेटनको निर्देशनमा बनेको यस चलचित्रमा टम हल्याण्डसँगै जेन्डाया, ज्याकब बटालोन, सिडी सिन्क, जन बर्नथल, मार्क रुफालो र माइकल मान्डोजस्ता दिग्गज कलाकारहरूको अभिनय छ।

समीक्षकहरूका अनुसार टम हल्याण्डले यस फिल्ममा आफ्नो करिअरकै उत्कृष्ट र परिपक्व अभिनय प्रस्तुत गरेका छन्। किशोरीय चञ्चलताबाट परिपक्व, गम्भीर र एकाकी युवामा रूपान्तरित भएको पिटर पार्करको चरित्रलाई उनले निकै जीवन्त बनाएका छन् भने जेन्डाया र सिडी सिन्कको प्रस्तुतिले पनि दर्शकको मन जितेको छ।

एक्सन र इमोसनको उत्कृष्ट सन्तुलन मिलाइएको यो फिल्ममा वेब-स्विङ्गिङ दृश्य, छायांकन र भिजुअल इफेक्ट्सलाई साम् राइमीको पुरानो स्पाइडरम्यान ट्रिलोजीपछिकै उत्कृष्ट मानिएको छ।

हलिउडका प्रमुख मनोरञ्जन सञ्चारमाध्यम तथा समीक्षकहरूले ‘स्पाइडरम्यान : ब्राण्ड न्यु डे’ को प्रशंसा गरेका छन्। भेराइटी र रोटन टोमेटोजमा प्रकाशित समीक्षा अनुसार मल्टिभर्सको भिडभाडबाट टाढा रहेर पिटर पार्करको आन्तरिक पीडा र भावनात्मक पक्षलाई यसले निकै परिपक्व ढंगले प्रस्तुत गरेको छ।

सुपरहिरो भनेको केवल ठूला एलियनसँग लड्ने मात्र होइन, आफ्नो शहरका साना अपराध नियन्त्रण गर्दै नागरिकको सारथी बन्नु हो भन्ने मूल मर्ममा कथा फर्किएको छ। समग्रमा, ‘स्पाइडरम्यान : ब्राण्ड न्यु डे’ ले मनोरञ्जन मात्र नदिई टम हल्याण्डको स्पाइडरम्यान अवतारलाई एक नयाँ, गम्भीर र परिपक्व मोडमा पुर्‍याएको छ।