सुनसरी घटनाको चार दिनपछि प्रधानमन्त्रीको सम्बोधन, ‘एउटा घटना हेरेर सिंगो समुदायलाई आक्षेप नलगाऔँ’

काठमाडौं। सुनसरीको देवानगञ्जमा साम्प्रादायिक झडपको चार दिनपछि प्रधानमन्त्री वालेन्द्र शाहले देशबासीका नाममा सम्बोधन गरेका छन्। घटनाका विषयमा सरकारको कुनै पनि औपचारिक धारणा नआएको भन्दै आलोचना भइरहेका बेला शाहले बिहीबार सम्बोधन गरेका हुन्।

साढे चार मिनेटको रेकर्डेड भिडिओ सन्देश जारी गर्दै शाहले सामाजिक सद्भाव र एकताका लागि सवै पक्षहरुलाई अपिल गरेका छन्।

शाहले सम्बोधानमा सुनसरी तथा मधेश प्रदेशमा ज्यान गुमाएका परिवारप्रति समवेदना व्यक्त गरेका छन्।

घटना छानबिनका लागि गृह मन्त्रालयले समिति गठन गरेको र निश्पक्ष छानबिन हुने उनले बताएका छन्। घटनामा संलग्न जोसुकैलाई पनि कानुनी कारबाहीको दायरामा ल्याउने प्रतिबद्धता पनि उनले जनाएका छन्।

स्थानीय स्तरमा विश्वासको वातावरण बनाउन केन्द्र तहमा सर्वदलीय बैठक, स्थानीय तहमा सामाजिक व्यक्ति र धार्मिक गुरुहरुसँग गहन संवाद भइरहेको पनि उनले जनाएका छन्।

सरकारले घटनालाई गम्भीरतापूर्वक लिएको र घटना भएका जिल्लामा गृहमन्त्री स्वयम पुगिसकेको पनि उनले सम्बोधनमा उल्लेख गरेका छन्। सुरक्षा परिषदले घटनाबारे विश्लेषण र शान्ति सुरक्षाका विषयमा आवश्यक निर्णय गरेको पनि उनले जनाएका छन्।

सरकारका सवै संयन्त्र क्रियाशील रहेका बताउँदै उनले साम्प्रदायिक द्वन्द्व बढाउने गरी सामाजिक सञ्जाल र अन्य माध्यमबाट कुनै पनि भ्रामक जानकारी प्रचार नगर्न पनि प्रधानमन्त्री शाहले अपिल गरेका छन्।

मुलुकमा सदिऔँदेखिको आपसी भाइचार रहेको स्मरण गराउँदै उनले त्यसलाई कायम राख्न सरकार सचेत रहेको पनि बताएका छन्। धर्म आपसमा जोड्ने र प्रेम बाँड्ने शक्ति भएको र संसारको कुनै पनि धर्मले मानव हितकै कल्पना गरेको पनि उनले सम्बोधनमा बताए।

देशको कुनै स्थानमा भएको घटनालाई लिएर सिंगो समुदायलाई आक्षेप लगाउनु उपयुक्त नहुने पनि सम्बोधनमा उल्लेख गरेका छन्।

सम्बोधनको पूर्णपाठ

आदरणीय बुबाआमा, दिदीबहिनी तथा दाजुभाइहरू,

म आज एक अत्यन्त संवेदनशील घडीमा तपाईंहरूसामु उपस्थित भएको छु।

केही दिनअघि सुनसरीको देवानगन्ज, सिरहा लगायत स्थानमा भएका दुःखद घटना र त्यसपछि केही जिल्लाहरूमा उत्पन्न अशान्त वातावरणलाई लिएर नेपाल सरकार पूर्ण रूपमा गम्भीर र संवेदनशील छ। यस दुःखद घटनामा परी निधन हुनुभएका हाम्रा नागरिकहरू जयप्रकाश मेहता, ओमप्रकाश मेहता र गणेश यादवप्रति म भावपूर्ण श्रद्धाञ्जली अर्पण गर्दछु। साथै, शोकसन्तप्त परिवारजनहरूमा नेपाल सरकारका तर्फबाट गहिरो समवेदना व्यक्त गर्दछु।

घटनामा परी घाइते हुनुभएका सम्पूर्ण नागरिकहरूको शीघ्र स्वास्थ्यलाभको कामना गर्दछु। घाइतेहरूको उपचारमा कुनै पनि प्रकारको कमी वा ढिलाइ हुन नदिन सम्बन्धित स्वास्थ्य निकायहरूलाई स्पष्ट निर्देशन दिइसकिएको छ।

घटना भएलगत्तै सबै सुरक्षा निकायहरूले तत्काल घटनास्थलमा पुगेर परिस्थितिलाई सामान्य बनाउने, थप अप्रिय घटना हुन नदिने र शान्ति(सुरक्षा कायम गर्ने प्रयास निरन्तर गरिरहेका छन्। घटनाको निष्पक्ष छानबिन गरी दोषीलाई कडा कानुनी कारबाही गर्न गृह मन्त्रालयले छानबिन समिति गठन गरिसकेको छ। म सबैमा विश्वास दिलाउन चाहन्छु कि यो छानबिन पूर्ण रूपमा निष्पक्ष र पारदर्शी हुनेछ। घटनामा संलग्न दोषी जो(कोही भए पनि कानुनी दायरामा ल्याउन सरकार प्रतिबद्ध छ।

अवस्था थप नबिग्रियोस्, कुनै पनि नागरिकको जनधनको क्षति हुन नपाओस् र स्थानीय स्तरमा विश्वासको वातावरण बनोस् भन्नका लागि नेपाल सरकार निरन्तर क्रियाशील छ। परिस्थिति सामान्यीकरण गर्न केन्द्र स्तरमा सर्वदलीय बैठक आह्वान गरी गहन छलफल गरिएको छ भने स्थानीय तहसम्मै जनप्रतिनिधि, नागरिक समाज, विभिन्न धार्मिक गुरुहरू, समुदायका अगुवा तथा सामाजिक व्यक्तित्वहरूसँग निरन्तर संवाद भइरहेको छ।

स्थानीय स्थितिको प्रत्यक्ष अनुगमन गर्न, पीडित पक्षसँग संवाद गर्न र शान्ति(सुरक्षालाई थप सुदृढ बनाउन गृहमन्त्री स्वयं, सुरक्षा निकायका उच्च अधिकारीहरूसहित घटनास्थलतर्फ प्रस्थान गरिसक्नुभएको छ। साथै, देशको समग्र शान्ति(सुरक्षाको अवस्थाबारे गम्भीर समीक्षा गर्न राष्ट्रिय सुरक्षा परिषद्को बैठक बसी परिस्थिति अनुसारका आवश्यक निर्णयहरूसमेत गरिसकिएको छ।

यस्तो संवेदनशील घडीमा सामाजिक सञ्जाल वा अन्य माध्यमबाट असत्य, अपुष्ट सूचना, अफवाह, घृणा फैलाउने सामग्री वा समुदायबीच वैमनस्य बढाउने अभिव्यक्तिको प्रचारप्रसार नगर्नरनगराउन अनुरोध गर्दछु। साथै, सरकारी निकायहरूबाट जारी भएका आधिकारिक तथ्य र सूचनामा मात्र विश्वास गर्न विशेष आग्रह गर्दछु।

प्रत्येक नागरिकको जीउधनको रक्षा गर्नु, सामाजिक सद्भाव जोगाउनु र समाजमा शान्ति कायम राख्नु राज्यको सर्वोच्च र प्राथमिक दायित्व हो। आगामी दिनमा पनि राज्य थप सतर्क र संवेदनशील रहनेछ। प्रत्येक नागरिकको जीवन सुरक्षाका लागि सरकारका सम्पूर्ण संयन्त्रहरू अहोरात्र खटिनेछन्। शान्ति-सुरक्षा भङ्ग गर्ने, अराजकता फैलाउने वा हाम्रो सदियौँ पुरानो सामाजिक सद्भाव, सहिष्णुता र भाइचारा खलबल्याउने कुनै पनि क्रियाकलापप्रति सरकार पूर्ण रूपमा सचेत छ र यस्ता गतिविधिमाथि कडा कदम चालिनेछ।

नेपालको संविधानले प्रत्येक नागरिकलाई आ-आफ्नो धर्म, संस्कृति र परम्परा मान्ने मौलिक हक प्रदान गरेको छ। यो संवैधानिक दायित्व निर्वाह गर्न सरकार पूर्ण रूपमा प्रतिबद्ध छ।

धर्म, समाजलाई आपसमा जोड्ने र प्रेम बाँड्ने शक्ति हो। संसारको कुनै पनि धर्म वा संस्कृतिले हिंसा, घृणा र विभाजन सिकाउँदैन। सबै धर्मको मूल सार करुणा, दया, प्रेम र शान्ति नै हो।

देशको कुनै एक स्थानमा भएको अनपेक्षित र दुःखद घटनालाई लिएर कुनै सिङ्गो समुदायलाई आरोपित गर्नु र देशका अन्य भूभागमा समेत त्यसको प्रतिशोधको आगो फैलाउनु कुनै पनि दृष्टिकोणबाट न्यायोचित वा न्यायसङ्गत हुन सक्दैन।

आदरणीय बुबाआमा, दिदीबहिनी तथा दाजुभाइहरू,

हाम्रो इतिहास साक्षी छ -कठिनभन्दा कठिन र अप्ठ्यारो परिस्थितिमा पनि आपसी एकता, सहिष्णुता र विवेक नै हाम्रा सबैभन्दा ठूला शक्ति बनेका छन्।

हामी सबैले जिम्मेवार नागरिकको भूमिका निर्वाह गर्दै यो सुन्दर र शान्त नेपाली आकाशमा मडारिएको अशान्तिको बादल हटाउनुपर्नेछ।

हम आम नागरिक, नागरिक समाज, धार्मिक समुदाय, सब आदरणीय अगुवा, सब राजनीतिक दल आ जिम्मेवार सञ्चारके माध्यम सबके धैर्यता आ संयमता अपना क शान्ति, सद्भाव, भाइचारा आ राष्ट्रिय एकता कायम राख के लेल सरकार के तरफ स हार्दिक अपिल के  रहल छी।

धन्यवाद।