४ लाख भारतीय रुपैयाँसहित नेपालगञ्जस्थित बसपार्क क्षेत्रबाट एकजना पक्राउ

नेपालगञ्ज। प्रहरीले अवैध कारोबारमा संलग्न भएका आरोपमा नेपालगञ्जस्थित बसपार्क क्षेत्रबाट एक जनालाई पक्राउ गरेको छ।

बसपार्कको न्यू लक्ष्मी होटेल एण्ड लजका कर्मचारी वीरबहादुर राउतलाई ४ लाख भारतीय रुपैयाँसहित बुधबार पक्राउ गरिएको जिल्ला प्रहरी कार्यालय, बाँकेका प्रहरी उपरीक्षक अङ्गुर जिसीले जानकारी दिए।

उनले बसपार्क क्षेत्रमा अवैध कारोबार भइरहेको भन्ने सूचनाका आधारमा ८०० थान भारतीय ५०० दरका नोटसहित राउतलाई पक्राउ गरी हिरासतमा लिइएको बताए।

‘लुकाएर राखेको अवस्थामा हामीले ती नोट फेला पारेका हौँ,’ प्रहरी उपरीक्षक जिसीले भने।

भारतीय ५०० दरका नोट नेपालमा कारोबार गर्न प्रतिबन्ध लगाइएको प्रहरीको भनाइ छ।

उनले बसपार्कका होटेलबाट अवैध काम धेरै हुने गरेको गुनासो आएको उल्लेख गर्दै रावतमाथि नेपाल राष्ट्र बैंकको दफाबमोजिम कारबाही हुने जानकारी दिए।

न्यू लक्ष्मी होटेल एण्ड लजका संचालक धर्मराज बस्नेतले जाजरकोटबाट आएका ६ जना ठेकेदारको जिम्मामा रहेका करिब ५० जना श्रमिकलाई भारतीय रुपैयाँ आवश्यक परेकाले रकम सङ्कलन गरी सटहीका लागि कर्मचारी राउतलाई पठाइएको जिकिर गरे। रासस