विराजभक्तले देखेनन् सिँचाइ पूर्वाधारमा लगानीको प्रतिफल, कृषि मन्त्रालयसँग सहकार्य गर्ने

काठमाडौं। सिँचाइ पूर्वाधार र कृषि उत्पादनलाई एकीकृत रूपमा अगाडि बढाउन दुई मन्त्रालयले सहकार्य गर्ने भएका छन्।

ऊर्जा, जलस्रोत तथा सिँचाइ र कृषि, वन तथा पर्यावरण मन्त्रालयले सिँचाइ, उत्पादन, कृषि सेवा र बजारीकरणलाई एउटै योजनाअन्तर्गत अघि बढाउने भएका हुन्। यस सम्बन्धमा मंगलबार ऊर्जामन्त्री विराजभक्त श्रेष्ठ र कृषिमन्त्री गीता चौधरीबीच छलफल भएको छ।

छलफलका क्रममा मन्त्री श्रेष्ठले किसानको खेतसम्म सिँचाइ सुविधा विस्तारमा ठूलो लगानी भइरहेको अवस्थामा आवश्यक पर्ने उन्नत बीउ, मल, प्रविधि, प्राविधिक सेवा र कृषि उपजको बजारीकरण प्रभावकारी हुन सके मात्र प्रतिफल प्राप्त हुने बताए।

उनले त्यसका लागि सिँचाइ र कृषिसम्बन्धी कार्यक्रमलाई मन्त्रालयगत सीमाभन्दा माथि उठेर एकीकृत योजनाका रूपमा कार्यान्वयन गर्न प्रस्ताव गरे।

कृषिमन्त्री चौधरीले प्रस्तावमा सहमति जनाउँदै आगामी दिनमा दुवै मन्त्रालयबीच नीति निर्माण, कार्यक्रम छनोट र कार्यान्वयन तहसम्म समन्वय गर्ने बताएको विराजभक्तको सचिवालयले जनाएको छ।

मन्त्री श्रेष्ठले गत साता पश्चिम नेपालका प्रमुख सिँचाइ आयोजनाको अनुगमन गरेका थिए। उनले रानीजमरा-कुलरिया, सिक्टा, बबई र राजापुर सिँचाइ प्रणालीको निरीक्षणका क्रममा किसान, आयोजना प्रमुख र प्राविधिकसँग अन्तरक्रिया गरेका थिए।