मेसीको पकड थप बलियो, २०औं गोलसँगै गोल्डेन बुट प्रतिष्पर्धामा एम्बाप्पेभन्दा अघि

अर्जेन्टिनाका कप्तान लियोनेल मेसीले फिफा विश्वकपमा आफ्नो ऐतिहासिक गोलयात्रालाई निरन्तरता दिएका छन्। उनले शुक्रबार केप भर्डेविरुद्ध गोल गर्दै लगातार आठौँ विश्वकप खेलमा गोल गर्ने कीर्तिमानलाई अझ विस्तार गरे। साथै, विश्वकप इतिहासमा आफ्नो कुल गोल संख्या २० पुर्‍याउँदै सर्वाधिक गोलकर्ताको सूचीमा दोस्रो स्थानका फ्रान्सका किलियन एम्बाप्पेलाई दुई गोलले पछि पारे।

मेसीले खेलको २९औँ मिनेटमा गोल गर्दै अर्जेन्टिनालाई अग्रता दिलाएका थिए। अन्ततः रोमाञ्चक बनेको खेलमा अर्जेन्टिनाले अतिरिक्त समयमा ३–२ को जित निकाल्दै कठिन संघर्षपछि अन्तिम १६ मा स्थान सुरक्षित गर्‍यो।

यो विश्वकपमा मेसीको यो सातौँ गोल हो। यससँगै उनले गोल्डेन बुटको दौडमा एम्बाप्पेलाई एक गोलले उछिनेका छन्। एम्बाप्पेका हाल ६ गोल छन्। पछिल्ला लगातार आठ विश्वकप खेलमा मेसीले १२ गोल गरिसकेका छन्।

मेसीका अर्जेन्टिनी तथा इन्टर मियामीका सहकर्मी रोड्रिगो डे पउलले भने, “उनको साथी हुन पाउनु मेरो लागि धेरै ठूलो कुरा हो। मित्रता जीवनका सबैभन्दा महत्त्वपूर्ण पक्षमध्ये एक हो। उनीसँग यी अविस्मरणीय क्षणहरू बाँड्न पाउँदा आफूलाई भाग्यमानी ठान्छु।”

शुक्रबारको खेलमा मेसीले सुरुआतदेखि नै आक्रमणको संकेत दिएका थिए। १५औँ मिनेटमा उनको शक्तिशाली प्रहार गोलपोस्टको दायाँ भागबाट बाहिरियो। त्यसको तीन मिनेटपछि उनले करिब २५ यार्ड टाढाबाट फ्रिकिक प्रहार गरे पनि केप भर्डेका गोलरक्षक भोजिन्हाले सहजै बचाए।

तर त्यसपछि अर्जेन्टिनाले लय समात्यो। २९औँ मिनेटमा डिफेन्डर लिसान्द्रो मार्टिनेजको उत्कृष्ट पासमा मेसीले अफसाइड जालबाट जोगिँदै बल नियन्त्रण गरे र गोलरक्षक भोजिन्हाको काँधमाथिबाट आकर्षक फिनिस गर्दै गोल गरे।

यो मेसीको अन्तर्राष्ट्रिय फुटबलमा १२४औँ गोल पनि हो। अन्तर्राष्ट्रिय फुटबलमा उनीभन्दा बढी गोल गर्ने खेलाडी पोर्चुगलका क्रिस्टियानो रोनाल्डो मात्र हुन्, जसका नाममा १४६ गोल छन्।

गोल गरेपछि मेसीले हात फैलाउँदै पास उपलब्ध गराएका मार्टिनेजतर्फ संकेत गरे। त्यसपछि टोलीका खेलाडीहरूले उनलाई घेराबन्दी गर्दै खुसी साटेका थिए।

गोल्डेन बुटको प्रतिस्पर्धा भने मेसी र एम्बाप्पेमा मात्र सीमित छैन। नर्वेका एर्लिङ हालान्ड र इङ्ल्यान्डका ह्यारी केनले पाँच–पाँच गोल गरेका छन्। फ्रान्सका उस्मान डेम्बेले, स्पेनका मिकेल ओयार्जाबाल, ब्राजिलका भिनिसियस जुनियर र सेनेगलका इस्माइला सारले चार–चार गोल गरेका छन्। यद्यपि, सेनेगल प्रतियोगिताबाट बाहिरिइसकेकाले सार अब प्रतिस्पर्धामा छैनन्।

नर्वे, इङ्ल्यान्ड र फ्रान्स यसअघि नै अन्तिम १६ मा पुगिसकेका छन्। अर्जेन्टिनाले पनि केप भर्डेविरुद्ध कठिन जित निकाल्दै नकआउट चरणमा स्थान बनाएको हो।

मेसीले अहिलेसम्म विश्वकपमा गोल्डेन बुट जितेका छैनन्। सन् २०२२ को विश्वकपमा उनले सात गोल गरेका थिए, तर आठ गोल गरेका एम्बाप्पेपछि दोस्रो स्थानमा सीमित भए। त्यही प्रतियोगितामा उनले अर्जेन्टिनालाई विश्वविजेता पनि बनाएका थिए। सन् २०१४ को विश्वकपमा भने चार गोलसहित उनी संयुक्त तेस्रो स्थानमा रहेका थिए।

यदि प्रतियोगिता सकिँदा दुई वा बढी खेलाडी समान गोलसहित शीर्ष स्थानमा रहे भने विजेता निर्धारणका लागि फिफाले पहिलो आधारका रूपमा असिस्ट संख्या र त्यसपछि कम समय खेलेको खेलाडीलाई प्राथमिकता दिनेछ। शुक्रबारको खेलअघि यस्तो अवस्था आएको भए दुई बढी असिस्ट गरेका कारण एम्बाप्पे मेसीभन्दा अगाडि रहने थिए। (एपी)