सरकारले सुकुम्बासीलाई बाँड्न थाल्यो लालपुर्जा, भूमिहीन २९ परिवार बने जग्गाधनी

काठमाडौं। सरकारले भूमिहीन दलित र सुकुम्बासी परिवारलाई जग्गाधनी प्रमाणपत्र (लालपुर्जा) वितरण गर्न सुरु गरेको छ।

सरकारले बर्दियाको बढैयाताल गाउँपालिका-४ का भूमिहीन दलित र सुकुम्बासीमध्ये २९ परिवारलाई लालपुर्जा वितरण गरेको हो। लालपुर्जा प्राप्त गरेसँगै उनीहरू अब कानुनीरुपमा जग्गाधनी बनेका छन्।

भूमिहीन दलित, सुकुम्बासी र अव्यवस्थित बसोबासीको समस्या दीर्घकालीन रूपमा समाधान गर्ने सरकारको लक्ष्यअनुसार लालपुर्जा वितरण गरेेको भूमि व्यवस्था मन्त्रालयले जनाएको छ।

भूमि व्यवस्थामन्त्री प्रतिभा रावलले भूमिहीन दलित, सुकुम्बासी र अव्यवस्थित बसोबासीको समस्यालाई सरकारले उच्च प्राथमिकतामा राखेर बर्दियाबाट लालपुर्जा वितरण थालेको र देशभरका भूमिहीनलाई जग्गाको कानुनी स्वामित्व दिलाउने बताइन्।