अमेरिकी स्वास्थ्य बीमा कार्यक्रमको ३.७ अर्ब डलर ठगी गरेर फरार व्यवसायी हिल्मी टर्कीबाट पक्राउ

अर्बौं डलर ठगीका आरोपित अमेरिकी व्यवसायी इब्राहिम खाल्दुन हिल्मी टर्कीबाट पक्राउ परेका छन्। अमेरिकी स्वास्थ्य बीमा कार्यक्रम मेडिकेयरबाट ठगी गरेको आरोपपछि उनी एक वर्षभन्दा बढी समय फरार थिए।

पक्राउ परेपछि उनलाई अमेरिकामा फिर्ता ल्याइएको छ। अमेरिकी संघीय अनुसन्धान ब्युरो (एफबीआई) ले सोमबार यसको पुष्टि गरेको हो।

फ्लोरिडाको डेलरे बीच निवासी हिल्मीमाथि ३.७ अर्ब अमेरिकी डलर बराबरको मेडिकेयर ठगी योजनाको नेतृत्व गरेको आरोप छ। एफबीआई निर्देशक काश पटेलले यसलाई अमेरिकी इतिहासकै सबैभन्दा ठूलो स्वास्थ्य सेवा ठगी अनुसन्धानमध्ये एक बताएका छन्। मेडिकेयर अमेरिका सरकारले सञ्चालन गर्ने स्वास्थ्य बीमा कार्यक्रम हो, जसले ६५ वर्ष वा सोभन्दा माथिका नागरिक तथा अपांगता भएका कम उमेरका व्यक्तिलाई स्वास्थ्य सेवा सुविधा उपलब्ध गराउँछ।

हिल्मीले कागजमा वैध देखिने स्वास्थ्य सामग्री आपूर्ति गर्ने कम्पनीहरू सञ्चालन गर्थे। फ्लोरिडा राज्यको अभिलेखअनुसार उनले सञ्चालन गरेको ‘सनसाइन सिनियर सोलुसन्स’ नामक कम्पनीले वृद्धवृद्धाका लागि आवश्यक चिकित्सकीय उपकरण उपलब्ध गराउने भन्दै मेडिकेयरमा बिल पेस गर्ने गरेको थियो।

तर अभियोजन पक्षका अनुसार ती कम्पनीहरू करदाताको रकम ठगी गर्न प्रयोग गरिएका आवरण कम्पनी थिए। हिल्मीको सञ्जालले घुँडाको सपोर्ट, हातको ब्रेस, घाउमा प्रयोग हुने कुशन, क्याथेटरलगायतका स्वास्थ्य सामग्रीका नाममा मेडिकेयरमा झुटा दाबी पेस गरेको आरोप छ। ती सामग्री धेरै बिरामीले मागेकै थिएनन्, कतिपयले प्राप्त नै गरेनन् भने केही बिरामीको अस्तित्वसमेत नभएको अनुसन्धानमा खुलेको छ।

अधिकारीहरूका अनुसार हिल्मीको सञ्जालले दर्जनौँ वैध देखिने कम्पनीमार्फत दाबी पेस गरेकाले लामो समयसम्म ठगी लुकाउन सफल भएको थियो। वास्तविक कम्पनी, वास्तविक स्वास्थ्य सामग्री र विश्वासयोग्य देखिने बिरामी विवरण प्रयोग गरिएकाले ठगी पहिचान गर्न कठिन भएको बताइएको छ।

संघीय अनुसन्धानकर्ताहरू नजिकिँदै गएपछि हिल्मी २०२५ मे महिनामा पक्राउ पर्नुअघि नै अमेरिका छाडेर फरार भएका थिए। त्यसयता उनी एक वर्षभन्दा बढी समय अमेरिकी कानुनी निकायको पहुँचबाहिर थिए।

अन्ततः टर्कीका अधिकारीहरूले उनलाई पक्राउ गरे। त्यसपछि एफबीआईको ‘क्रिटिकल इन्सिडेन्ट रेस्पोन्स ग्रुप’ले विदेशी मुलुकबाट अभियुक्तलाई अमेरिकी अधिकारक्षेत्रमा ल्याउने ‘फरेन ट्रान्सफर अफ कस्टडी’ प्रक्रिया सञ्चालन गरी उनलाई अमेरिकामा फिर्ता ल्याएको हो।

एफबीआईले सार्वजनिक गरेको तस्वीरमा हिल्मीलाई हल्का नीलो रंगको बन्दी पोसाकमा, हातमा हथकडी लगाइएको अवस्थामा एफबीआई एजेन्टहरूको निगरानीमा देखाइएको छ।

एफबीआई निर्देशक पटेलले सामाजिक सञ्जाल एक्समार्फत पक्राउबारे जानकारी दिँदै एफबीआई मियामी, अमेरिकी न्याय विभाग, टर्कीका अधिकारीहरू तथा टर्कीका लागि अमेरिकी राजदूत टम बराकको योगदानको प्रशंसा गरेका छन्। उनका अनुसार राजदूत बराकको कूटनीतिक पहलले पक्राउ प्रक्रिया सफल बनाउन महत्त्वपूर्ण भूमिका खेलेको थियो।

हिल्मीको गिरफ्तारी हुनुभन्दा एक साताअघि मात्रै मेडिकेयर ठगीकै अर्को १.३ अर्ब डलरको मुद्दामा फरार रहेका हर्बर्ट किम्बललाई पनि अमेरिकामा फिर्ता ल्याइएको थियो। यी दुई प्रकरणमा मात्रै अमेरिकी करदाताको करिब ५ अर्ब डलर रकम हिनामिना भएको आरोप छ।

अब हिल्मी संघीय अदालतमा उपस्थित भएर मेडिकेयर ठगीसम्बन्धी अभियोगको सामना गर्नेछन्। हराएको रकम फिर्ता असुल गर्न सकिने वा नसकिने विषय भने अझै स्पष्ट भएको छैन।

अमेरिकामा मेडिकेयर ठगीमा दोषी ठहरिए जरिवाना, नागरिक दण्डदेखि लिएर धेरै वर्षसम्मको कैद सजायसम्म हुन सक्छ। अभियोजन पक्षले आगामी केही दिनमा थप विवरण सार्वजनिक गर्ने अपेक्षा गरिएको छ।

यो मुद्दा ‘अपरेसन गोल्ड रश’ नामक संघीय अभियानअन्तर्गतको हो। उक्त अभियानले मेडिकेयर कार्यक्रमको दुरुपयोग गर्दै आएका अन्तर्राष्ट्रिय संगठित अपराध सञ्जालमाथि कारबाही गरिरहेको छ। अभियानअन्तर्गत देशभर सयौँ अभियुक्तविरुद्ध आपराधिक मुद्दा दायर भइसकेका छन्।

पटेलले भनेका छन्, ‘अमेरिकी करदाताको पैसा हिनामिना गर्ने जोसुकै र जहाँ लुकेका भए पनि पक्राउ पर्नेछन्।’

यद्यपि अमेरिकी राष्ट्रपति डोनाल्ड ट्रम्पका दुई कार्यकालमा स्वास्थ्य सेवा ठगीमा दोषी ठहरिएका ७० जनाभन्दा बढीले क्षमादान वा सजायमा छुट पाएका छन्। तीमध्ये फिलिप एस्फोर्मेस पनि छन्, जसको १.३ अर्ब डलरको मेडिकेयर ठगी प्रकरणलाई हालसम्म अमेरिकी इतिहासकै सबैभन्दा ठूलो व्यक्तिगत स्वास्थ्य सेवा ठगीको घटना मानिएको थियो। ट्रम्पले सन् २०२० मा उनको सजाय घटाइदिएका थिए।